وانا میں سکیورٹی فورسز کی بروقت کارروائی، بارود سے بھری گاڑی تباہ، ایک دہشت گرد ہلاک، 5 زخمی

وانا: سکیورٹی فورسز نے جنوبی وزیرستان لوئر کے علاقے وانا (غواخوا) میں انٹیلیجنس پر مبنی کارروائی کرتے ہوئے مبینہ دہشت گردی کی ایک بڑی کوشش ناکام بنا دی۔

سکیورٹی ذرائع کے مطابق کارروائی کے دوران بارودی مواد سے بھری ایک گاڑی، جسے مبینہ طور پر خودکش حملے کے لیے تیار کیا گیا تھا، آبادی سے دور تباہ کر دی گئی۔ حکام کا کہنا ہے کہ اس بروقت کارروائی سے شہری آبادی کو ممکنہ بڑے نقصان سے محفوظ رکھا گیا۔

ذرائع کے مطابق گاڑی میں موجود دھماکا خیز مواد کسی بڑے حملے میں استعمال کیے جانے کا خدشہ تھا۔ سکیورٹی فورسز نے کارروائی کے دوران پیشہ ورانہ حکمت عملی اختیار کرتے ہوئے شہریوں کی جان و مال کے تحفظ کو ترجیح دی۔

سکیورٹی ذرائع کا کہنا ہے کہ فورسز نے مشتبہ گاڑی کی مسلسل تین روز تک نگرانی کی اور جب وہ آبادی سے دور پہنچی تو اسے نشانہ بنایا گیا تاکہ شہری نقصان سے بچا جا سکے۔

کارروائی کے نتیجے میں بارود سے بھری گاڑی اور ایک موٹر سائیکل تباہ ہو گئی۔ سکیورٹی ذرائع کے مطابق ایک مبینہ دہشت گرد ہلاک جبکہ پانچ زخمی ہوئے۔

واضح رہے کہ اس کارروائی کی تفصیلات سکیورٹی ذرائع کی جانب سے فراہم کی گئی ہیں، جبکہ آزاد ذرائع سے ان معلومات کی الگ سے تصدیق سامنے نہیں آئی۔