ضلع واشک میں سکیورٹی فورسز کا آپریشن، 5 مبینہ دہشت گرد ہلاک، 4 زخمی

واشک: بلوچستان کے ضلع واشک میں سکیورٹی فورسز نے انٹیلی جنس بیسڈ آپریشن کے دوران 5 مبینہ دہشت گردوں کو ہلاک جبکہ 4 کو زخمی کر دیا۔ سکیورٹی ذرائع کے مطابق یہ کارروائی ضلع واشک کے علاقے پلانتک میں کی گئی۔

ذرائع کا کہنا ہے کہ بلوچستان میں آپریشن ردالفتنہ 3 کے تحت فتنہ الہندوستان کے خلاف سکیورٹی فورسز کی کارروائیاں جاری ہیں، جن کا مقصد علاقے میں دہشت گردی کے خطرات کا خاتمہ اور امن و امان کی صورت حال کو بہتر بنانا ہے۔

آپریشن کے دوران اسلحہ اور گولہ بارود برآمد

سکیورٹی ذرائع کے مطابق کارروائی کے دوران ہلاک ہونے والے مبینہ دہشت گردوں کے قبضے سے جدید اسلحہ اور گولہ بارود برآمد کیا گیا۔ برآمد شدہ سامان میں ایک آر پی جی-7، پانچ گولے، میگزینز، پانچ جدید ہتھیار، تین موبائل فونز اور دو موٹر سائیکلیں شامل ہیں۔

ذرائع کے مطابق آپریشن کے دوران مبینہ دہشت گردوں کے ٹھکانوں کو جدید ہتھیاروں سے نشانہ بنایا گیا۔

دہشت گردی کے خلاف کارروائیاں جاری رکھنے کا عزم

سکیورٹی ذرائع کا دعویٰ ہے کہ ہلاک ہونے والے مبینہ دہشت گرد مقامی آبادی کو لوٹنے، علاقے میں خوف و ہراس پھیلانے اور بنیادی ڈھانچے کو نقصان پہنچانے کی سرگرمیوں میں ملوث تھے۔

سکیورٹی فورسز نے بلوچستان میں دہشت گردی کے خاتمے کے عزم کا اعادہ کرتے ہوئے کہا ہے کہ امن و استحکام کے قیام اور دہشت گرد عناصر کے خلاف کارروائیاں جاری رکھی جائیں گی۔