شیخ حسینہ کی ممکنہ وطن واپسی کا خیرمقدم، سزائے موت پر نظرِ ثانی بھی ممکن: بنگلہ دیش

(ڈھاکہ)بنگلہ دیشی حکومت نے معزول سابق وزیرِ اعظم شیخ حسینہ واجد کی ممکنہ وطن واپسی کا خیرمقدم کرتے ہوئے کہا ہے کہ انہیں عدالت میں اپنے خلاف مقدمات کا سامنا کرنا ہوگا، تاہم عدالتی عمل کے دوران سزائے موت کے فیصلے پر نظرِ ثانی یا بریت کا امکان بھی موجود ہے۔

شیخ حسینہ واجد کے قریبی ذرائع کے مطابق وہ رواں سال کے اختتام تک رضاکارانہ طور پر ڈھاکا واپس آ کر اپنی جماعت عوامی لیگ کو دوبارہ فعال کرنے کا ارادہ رکھتی ہیں۔ 78 سالہ شیخ حسینہ اگست 2024 میں حکومت مخالف احتجاج کے بعد اقتدار سے محروم ہونے پر بھارت منتقل ہو گئی تھیں، جہاں وہ اس وقت مقیم ہیں۔

بنگلہ دیش کے وزیرِ اعظم طارق رحمٰن کے مشیر زاہد الرحمٰن نے میڈیا سے گفتگو میں کہا کہ شیخ حسینہ کو اپنے دفاع کے لیے بہترین قانونی ٹیم کے ساتھ وطن واپس آنا چاہیے تاکہ وہ 2024 کے طلبہ کی قیادت میں ہونے والے احتجاج کے دوران مبینہ انسانیت کے خلاف جرائم کے الزامات کا عدالت میں سامنا کر سکیں۔

انہوں نے کہا کہ حکومت شفاف عدالتی کارروائی کو یقینی بنائے گی، جس کی نگرانی مبصرین بھی کر سکیں گے، جبکہ کارروائی کی ویڈیو کوریج بھی ممکن ہوگی۔ ان کا کہنا تھا کہ عدالت مکمل شواہد کی بنیاد پر فیصلہ کرے گی اور یہ بھی ممکن ہے کہ سزائے موت کے فیصلے پر نظرِ ثانی ہو یا شیخ حسینہ کو بری قرار دے دیا جائے۔

زاہد الرحمٰن نے مزید کہا کہ حکومت شیخ حسینہ کی ممکنہ واپسی کے معاملے پر کسی قسم کے دباؤ کا شکار نہیں اور قانونی تقاضے پورے ہونے کی صورت میں بھارت بھی ڈھاکا سے مشاورت کے بعد ان کی واپسی کے انتظامات کر سکتا ہے۔

شیخ حسینہ واجد، جو بنگلہ دیش کے بانی شیخ مجیب الرحمٰن کی صاحبزادی ہیں، کو گزشتہ سال نومبر میں ڈھاکا کی ایک خصوصی عدالت نے 2024 کے احتجاج کے دوران مبینہ انسانیت کے خلاف جرائم کے مقدمے میں عدم موجودگی میں سزائے موت سنائی تھی۔ انہوں نے اپنے خلاف تمام الزامات اور عدالتی فیصلوں کو سیاسی انتقام قرار دیتے ہوئے مسترد کر دیا ہے۔

ادھر بھارتی وزارتِ خارجہ کے ترجمان رندھیر جیسوال نے شیخ حسینہ کی ممکنہ واپسی سے متعلق سوال پر کہا کہ بھارت کا مؤقف تبدیل نہیں ہوا، حوالگی سے متعلق کسی بھی درخواست سے قانون کے مطابق نمٹا جائے گا۔