بالٹی مور میں “سکھ آف امریکہ” کی ایوارڈ تقریب، رمیش سنگھ اروڑا کو خصوصی ایوارڈ سے نوازا گیا

( بالٹی مور / میری لینڈ ) امریکہ کی ریاست میری لینڈ کے شہر بالٹی مور میں “سکھ آف امریکہ” کی جانب سے ایک پروقار ایوارڈ تقریب کا انعقاد کیا گیا، جس میں امریکہ بھر سے تعلق رکھنے والی سکھ برادری کی ممتاز شخصیات، سماجی رہنماؤں، کاروباری افراد اور نوجوانوں نے شرکت کی۔

سکھ آف امریکا کے چیئرمین جسدیپ سنگھ نے اپنے خطاب میں کہا کہ تقریب کا مقصد امریکہ میں مقیم سکھ برادری کے ایسے ہیروز کو خراجِ تحسین پیش کرنا ہے جنہوں نے مختلف شعبہ ہائے زندگی میں نمایاں خدمات انجام دیتے ہوئے نہ صرف اپنی کمیونٹی بلکہ امریکی معاشرے میں بھی مثبت کردار ادا کیا۔ اس موقع پر مختلف شعبوں میں نمایاں کارکردگی دکھانے والی شخصیات میں ایوارڈز اور تعریفی اسناد تقسیم کی گئیں۔

اس موقع پر مہمان خصوصی اور پاکستان کے صوبہ پنجاب کے وزیر برائے اقلیتی امور اور انسانی حقوق رمیش سنگھ ارورا کو بھی خصوصی ایوارڈ سے نوازا گیا۔ اپنے خطاب میں رمیش سنگھ نے کہا کہ پاکستان ایک امن کی دھرتی ہے اور وہاں بسنے والا ہر شخص برابر کا شہری تصور کیا جاتا ہے۔ رمیش سنگھ نے امریکا سے پاکستان آنے والے سکھ یاتریوں کیلئے آن ارائیول ویزوں کا بھی اعلان کیا۔

مشہور بزنس مین ساجد تارڑ نے تقریب سے خطاب کرتے ہوئے کہا کہ ہماری سرحدیں ضرور الگ ہیں لیکن ہمارے دل، ہماری سوچ اور ایک دوسرے کو سمجھنے کی صلاحیتیں ایک جیسی ہیں۔ انہوں نے کہا کہ مختلف مذاہب اور قومیتوں سے تعلق رکھنے والے افراد جب ایک پلیٹ فارم پر جمع ہوتے ہیں تو محبت، بھائی چارے اور انسانیت کا پیغام مزید مضبوط ہوتا ہے۔

رمیش سنگھ اروڑا نے کہا کہ پاکستان میں موجود گوردواروں کی جس اعلیٰ سطح پر دیکھ بھال اور تزئین و آرائش کی جارہی ہے، اس پر وہ وزیراعظم پاکستان میاں محمد شہباز شریف اور وزیراعلیٰ پنجاب محترمہ مریم نواز کے بے حد ممنون ہیں۔