وزیراعلیٰ خیبرپختونخوا کو گرفتار کرکے پیش کرنے کا حکم

(اسلام آباد) ڈسٹرکٹ اینڈ سیشن کورٹس اسلام آباد نے وزیراعلیٰ خیبرپختونخواسہیل آفریدی کے ناقابلِ ضمانت وارنٹ گرفتاری برقرار رکھتے ہوئے انہیں گرفتار کرکے عدالت میں پیش کرنے کا حکم جاری کر دیا ہے۔

تفصیلات کے مطابق سینئر سول جج عباس شاہ نے ریاستی اداروں پر مبینہ گمراہ کن الزامات عائد کرنے اور ان کی ساکھ متاثر کرنے سے متعلق مقدمے کی سماعت کی۔

دورانِ سماعت وزیراعلیٰ خیبرپختونخوا عدالت میں پیش نہ ہوئے، جس پر عدالت نے ان کے پہلے سے جاری ناقابلِ ضمانت وارنٹ گرفتاری برقرار رکھنے کا فیصلہ سنایا اور قانون نافذ کرنے والے اداروں کو انہیں گرفتار کرکے پیش کرنے کی ہدایت کی۔

عدالتی ریکارڈ کے مطابق سہیل آفریدی کے خلاف پیکا ایکٹ کے تحت مقدمہ درج کیا گیا تھا، جس کی تحقیقات این سی سی آئی اے کی جانب سے کی جا رہی ہیں۔

عدالت نے کیس کی مزید سماعت 29 جون تک ملتوی کرتے ہوئے متعلقہ حکام سے آئندہ سماعت پر پیش رفت رپورٹ بھی طلب کر لی ہے۔

مقدمے میں ریاستی اداروں کے خلاف مبینہ طور پر گمراہ کن معلومات پھیلانے اور ان کی ساکھ کو نقصان پہنچانے کے الزامات شامل ہیں، جن کی قانونی کارروائی جاری ہے۔