لبنان جنگ بندی سے الگ نہیں ہوگا، ایران کا امریکا کو دوٹوک پیغام

(ایران) ایرانی پارلیمنٹ کے اسپیکر باقر قالیباف نے نام لیے بغیرامریکاکو سخت پیغام دیتے ہوئے کہا کہ وقت تیزی سے ختم ہو رہا ہے اور ایران کے اتحادی، بشمول لبنان، مزاحمتی محاذ کا مستقل حصہ ہیں۔ انہوں نے کہا کہ یہی ایران کی پیش کردہ 10 نکاتی تجویز کا پہلا اور بنیادی نکتہ ہے۔

باقر قالیباف نے مزید کہا کہ وزیراعظم شہبازشریف بھی لبنان کے مسئلے پر عوامی سطح پر واضح مؤقف دے چکے ہیں، اس لیے اس معاملے سے پیچھے ہٹنے یا انکار کی کوئی گنجائش موجود نہیں۔

انہوں نے جنگ بندی کی خلاف ورزیوں پر سخت ردعمل کی وارننگ دیتے ہوئے کہا کہ اگر معاہدے کی خلاف ورزی کی گئی تو اس کی بھاری قیمت چکانا ہوگی اور فوری و سخت جواب دیا جائے گا۔

ایرانی قیادت کے اس بیان کو خطے میں جاری کشیدگی کے تناظر میں اہم قرار دیا جا رہا ہے، جہاں جنگ بندی کو برقرار رکھنے کی کوششیں جاری ہیں جبکہ لبنان کو ممکنہ طور پر تنازع سے الگ رکھنے کی سفارتی کوششیں بھی سامنے آ رہی ہیں۔