آبنائے ہرمز سے جہازوں کی آزادانہ آمدورفت بحال ہوگی، معاہدہ جلد طے پانے کا امکان: اسکاٹ بیسنٹ

واشنگٹن: امریکی وزیر خزانہ اسکاٹ بیسنٹ نے کہا ہے کہ آبنائے ہرمز سے متعلق اہم معاہدہ آج یا کل طے پانے کا امکان ہے، جبکہ ایران کے ساتھ سفارتی رابطے اور بات چیت بھی جاری ہیں۔

ایک انٹرویو میں اسکاٹ بیسنٹ نے کہا کہ خطے میں کشیدہ صورتحال کے باوجود متعدد تجارتی جہاز بدستور آبنائے ہرمز سے گزر رہے ہیں، جس سے عالمی تجارت کا سلسلہ جاری ہے۔

انہوں نے بتایا کہ زیر غور معاہدے کا بنیادی مقصد آبنائے ہرمز میں تجارتی جہازوں کی آزادانہ، محفوظ اور بلا رکاوٹ آمدورفت کو یقینی بنانا ہے، تاکہ بین الاقوامی تجارت اور سپلائی چین متاثر نہ ہو۔

امریکی وزیر خزانہ کے مطابق اگر یہ معاہدہ طے پا جاتا ہے تو آبنائے ہرمز مکمل طور پر بحال ہو جائے گی، جس سے عالمی توانائی کی منڈیوں میں استحکام آئے گا اور تیل و گیس سمیت توانائی کی قیمتوں میں مزید کمی کا امکان پیدا ہوگا۔

اسکاٹ بیسنٹ نے مزید کہا کہ امریکا ایران کے ساتھ سفارتی سطح پر رابطے برقرار رکھے ہوئے ہے اور خطے میں کشیدگی کم کرنے کے لیے مختلف پہلوؤں پر بات چیت جاری ہے۔

ماہرین کے مطابق آبنائے ہرمز دنیا کی اہم ترین بحری گزرگاہوں میں شمار ہوتی ہے، جہاں سے عالمی سطح پر تیل اور قدرتی گیس کی بڑی مقدار کی ترسیل ہوتی ہے، اس لیے یہاں معمول کی بحری آمدورفت کی بحالی عالمی معیشت کے لیے اہم پیش رفت تصور کی جا رہی ہے۔