فیفا ورلڈ کپ 2026: سوئٹزر لینڈ اور قطر کا سنسنی خیز مقابلہ ایک، ایک گول سے برابر

فیفا ورلڈ کپ 2026 میں سوئٹزر لینڈ اور قطر کے درمیان کھیلا جانے والا سنسنی خیز میچ ایک، ایک گول سے برابر ختم ہوگیا، جہاں قطر نے آخری لمحات میں گول کر کے شکست کو ڈرا میں تبدیل کر دیا۔

میچ کا پہلا گول سوئٹزر لینڈ کے اسٹار فارورڈ بریل ڈونلڈ ایمبولو نے 17ویں منٹ میں اسکور کیا، جس کے بعد سوئس ٹیم نے برتری برقرار رکھی۔ تاہم انجری ٹائم میں قطر کے بوعلیم خوکی نے شاندار گول کر کے اپنی ٹیم کو میچ میں واپس لاتے ہوئے مقابلہ برابر کر دیا۔

اس ڈرا کے ساتھ قطر نے فیفا ورلڈ کپ کی تاریخ میں ایک اہم سنگ میل عبور کر لیا۔ یہ پہلا موقع ہے کہ قطری ٹیم کسی ورلڈ کپ میچ سے پوائنٹ حاصل کرنے میں کامیاب ہوئی ہے۔ اس سے قبل قطر عالمی کپ میں کبھی بھی کوئی پوائنٹ حاصل نہیں کر سکا تھا۔

میچ کے اختتام پر دونوں ٹیموں نے ایک، ایک پوائنٹ حاصل کیا، جبکہ شائقین نے دلچسپ اور سنسنی خیز مقابلے سے خوب لطف اٹھایا۔

دریں اثنا، ایونٹ میں آج مزید اہم مقابلے بھی شیڈول ہیں۔ برازیل اور مراکش کی ٹیمیں آمنے سامنے ہوں گی، جبکہ صبح 6 بجے سکاٹ لینڈ اور ہیٹی کے درمیان میچ کھیلا جائے گا۔ اسی روز ترکیہ اور آسٹریلیا کی ٹیمیں بھی میدان میں اتریں گی، جہاں شائقین ایک اور دلچسپ مقابلے کی توقع کر رہے ہیں۔