امن مذاکرات کی کامیابی پر پوری دنیا کا مفاد وابستہ ہے: مفتی تقی عثمانی

(اسلام آباد)سوشل میڈیا پلیٹ فارم ایکس پر جاری اپنے بیان میں مفتی تقی عثمانی نے کہا کہ ایران امریکا جنگ رکوانے میں پاکستانی قیادت کو اللہ تعالیٰ نے انتہائی نازک اور متوازن کردار ادا کرنے کی توفیق عطا فرمائی۔ انہوں نے کہا کہ پاکستان کی سفارتی کوششوں کی بدولت دنیا بھر میں ملک کا وقار غیرمعمولی طور پر بلند ہوا ہے۔

مفتی تقی عثمانی نے مزید کہا کہ آج ہونے والے مذاکرات انتہائی اہمیت کے حامل ہیں اور ان کی کامیابی سے خطے میں امن و استحکام کی راہ ہموار ہوسکتی ہے۔ انہوں نے کہا کہ وزیراعظم شہباز شریف نے بھی اس موقع پر عوام سے دعا کی اپیل کی ہے۔

انہوں نے عوام سے اپیل کرتے ہوئے کہا کہ موجودہ صورتحال میں ہم سب کو دعا میں مصروف رہنا چاہیے تاکہ مذاکرات کامیاب ہوں اور دنیا کو امن نصیب ہو۔

واضح رہے کہ ایران اور امریکا کے درمیان جاری امن مذاکرات کیلئے عالمی توجہ اسلام آباد پر مرکوز ہے جبکہ پاکستان اس اہم سفارتی عمل میں ثالثی کا کردار ادا کر رہا ہے۔