لاہور میں 10 روزہ بسنت کی منظوری، 29 جنوری سے 7 فروری تک جشن

لاہور: وزیراعلیٰ پنجاب مریم نواز شریف نے زندہ دلان لاہور کے لیے 10 روزہ بسنت منانے کی منظوری دے دی۔

حکومت پنجاب کے مطابق لاہور میں 29 جنوری سے 7 فروری 2027 تک بسنت منائی جائے گی، جبکہ 5 فروری کو یومِ کشمیر کے باعث بسنت جشن کا ایک روز ناغہ ہوگا۔

وزیراعلیٰ مریم نواز شریف نے نئے سال کی آمد پر لاہوریوں کو 10 روزہ بسنت کا تحفہ دینے کی ہدایت کرتے ہوئے کہا کہ یہ جشن پنجاب کے تہذیبی رنگ اور لاہور کی قدیم تاریخی روایت کے فروغ کا باعث بنے گا۔

انہوں نے متعلقہ اداروں کو ہدایت کی کہ گزشتہ بسنت کے مقابلے میں شہریوں کی حفاظت اور سہولت کے لیے مزید بہتر انتظامات کیے جائیں۔

مریم نواز نے عوام سے بھی اپیل کی کہ انسانی جانوں کی حفاظت یقینی بنانے کے لیے ذمہ داری اور احساس کا مظاہرہ کرتے ہوئے گزشتہ بسنت کی طرح ایک نئی مثال قائم کریں۔

یاد رہے کہ 25 سال کے تعطل کے بعد رواں سال 6 سے 8 فروری تک لاہور میں بسنت منائی گئی تھی۔