ٹرمپ انتظامیہ کا امیگرنٹ ویزا عمل عالمی سطح پر روکنے کا اعلان

(واشنگٹن) ٹرمپ انتظامیہ نے امریکی امیگرنٹ ویزا درخواستوں کی کارروائی عارضی طور پر عالمی سطح پر روک دی ہے۔ فنانشل ٹائمز کے مطابق امریکی سفارت خانوں اور قونصل خانوں میں مقررہ انٹرویوز بھی ری شیڈول کیے جا رہے ہیں اور درخواست گزاروں کو نئی تاریخ اور وقت سے بعد میں آگاہ کیا جائے گا

امریکی محکمہ خارجہ کا کہنا ہے کہ قونصلر افسران کی "گہری تربیت" کے لیے یہ وقفہ کیا گیا ہے تاکہ ویزا افسران درخواست گزاروں کی مالی صورتحال اور اس بات کا یکساں جائزہ لے سکیں کہ آیا وہ مستقبل میں امریکی حکومت کی عوامی امداد پر انحصار کرسکتے ہیں

یہ پیش رفت ایسے وقت میں ہوئی ہے جب ایک امریکی وفاقی جج نے گزشتہ ہفتے 75 ممالک کے شہریوں کے امیگرنٹ ویزوں کی معطلی کو غیر قانونی قرار دے کر ختم کردیا تھا، جس فہرست میں پاکستان بھی شامل تھا۔

نئی عالمی سطح کی ویزا کارروائی میں بحالی کی کوئی واضح تاریخ نہیں دی گئی، جس سے ہزاروں درخواست گزاروں، خصوصاً خاندانوں اور پہلے سے طے شدہ انٹرویوز رکھنے والوں میں تشویش پیدا ہوگئی ہے۔