امریکہ اور چین بڑی طاقتیں، حل صرف سفارت کاری، عالمی استحکام مشترکہ ہدف ہے: صدر شی

(بیجنگ) امریکی صدر ڈونلڈ ٹرمپ کے دورۂ چین کے دوران چینی صدر شی جن پنگ اور امریکی وفود کے درمیان اہم ملاقات ہوئی جس پر پوری دنیا کی نظریں جمی رہیں۔ دونوں رہنماؤں نے عالمی امن، ایران تنازع، تجارتی رکاوٹوں اور عالمی سپلائی چین کے مسائل سمیت اہم عالمی معاملات پر تبادلہ خیال کیا۔

امریکی صدر ٹرمپ بیجنگ کے پیپلز ہال پہنچے جہاں چینی صدر شی جن پنگ نے ان کا پرتپاک استقبال کیا۔ اس موقع پر گارڈ آف آنر پیش کیا گیا جبکہ چین کی جانب سے امریکا کو 250 ویں یوم آزادی کی مبارک باد بھی دی گئی۔

چینی صدر شی جن پنگ نے ملاقات کے دوران کہا کہ دنیا کو درپیش تمام بڑے بحرانوں کا حل صرف سفارت کاری اور مذاکرات میں پوشیدہ ہے۔ انہوں نے کہا کہ چین اور امریکا دو بڑی عالمی طاقتیں ہیں اور عالمی استحکام دونوں ممالک کا مشترکہ ہدف ہونا چاہیے۔

صدر شی نے کہا کہ عالمی امن اور معاشی ترقی کو برقرار رکھنا دونوں ممالک کی تاریخی ذمہ داری ہے۔ ان کا کہنا تھا کہ دنیا اس وقت ایران تنازع، عالمی سپلائی چین کے بحران اور تیزی سے بدلتی بین الاقوامی صورتحال جیسے سنگین چیلنجز کا سامنا کر رہی ہے۔

انہوں نے مزید کہا کہ اختلافات کے باوجود چین اور امریکا کو باہمی احترام، تعاون اور پرامن بقائے باہمی کے اصولوں پر چلنا ہوگا۔ شی جن پنگ نے اس امید کا اظہار کیا کہ دونوں ممالک تصادم کے بجائے شراکت داری کو فروغ دیں گے کیونکہ تعاون دونوں کے لیے فائدہ مند جبکہ ٹکراؤ نقصان دہ ثابت ہوگا۔

چینی صدر نے کہا کہ دونوں ممالک کے درمیان مشترکہ مفادات اختلافات سے کہیں زیادہ ہیں اور مستحکم پاک چین تعلقات نہیں بلکہ چین امریکا تعلقات پوری دنیا کے استحکام کے لیے ضروری ہیں۔

دوسری جانب امریکی صدر ڈونلڈ ٹرمپ نے صدر شی جن پنگ سے ملاقات کو اعزاز قرار دیتے ہوئے کہا کہ ان کے چین کے ساتھ تعلقات ہمیشہ بہترین رہے ہیں۔ انہوں نے کہا کہ وہ اس دورے میں دنیا کے بڑے کاروباری رہنماؤں کو ساتھ لائے ہیں اور یہ سربراہی ملاقات تاریخ کی اہم ترین سمٹس میں شمار کی جا رہی ہے۔

ٹرمپ نے کہا کہ دونوں ممالک کے درمیان تجارت اس ملاقات کا مرکزی موضوع ہے اور آنے والے برسوں میں چین اور امریکا کے تعلقات مزید مضبوط ہوں گے۔ انہوں نے کہا کہ جب بھی دونوں ممالک کو مشکلات کا سامنا ہوا، قیادت نے براہ راست رابطوں کے ذریعے فوری حل تلاش کیا۔

امریکی صدر نے چینی صدر کو عظیم رہنما قرار دیتے ہوئے کہا کہ دونوں ممالک کے درمیان مثبت تعلقات عالمی معیشت اور استحکام کے لیے ناگزیر ہیں۔

واضح رہے کہ امریکی صدر ڈونلڈ ٹرمپ دو روزہ سرکاری دورے پر گزشتہ روز چین پہنچے تھے۔ ان کے وفد میں ٹیسلا کے بانی ایلون مسک، این ویڈیا کے سی ای او جینسن ہوانگ، ایپل کے سی ای او ٹم کک اور بلیک راک کے سربراہ لیری فنک سمیت کئی اہم کاروباری شخصیات شامل ہیں۔