امریکی نیشنل انٹیلی جنس کی ڈائریکٹر تلسی گبارڈ مستعفی

واشنگٹن: امریکی میڈیا رپورٹس کے مطابق تلسی گبارڈ نے اپنے شوہر کو ہڈیوں کے کینسر کی تشخیص ہونے کے بعد استعفیٰ دینے کا فیصلہ کیا۔ انہوں نے جمعے کے روز اوول آفس میں امریکی صدر ڈونلڈ ٹرمپ کو اپنے فیصلے سے آگاہ کیا۔

دوسری جانب برطانوی خبر ایجنسی نے اس معاملے سے واقف ایک ذریعے کے حوالے سے دعویٰ کیا ہے کہ وائٹ ہاؤس کی جانب سے تلسی گبارڈ پر استعفیٰ دینے کے لیے دباؤ ڈالا گیا۔ تاہم اس حوالے سے باضابطہ طور پر کوئی تصدیق سامنے نہیں آئی۔

یاد رہے کہ تلسی گبارڈ نے گزشتہ سال فروری میں امریکی نیشنل انٹیلی جنس ڈائریکٹر کے عہدے کا حلف اٹھایا تھا اور وہ مختصر عرصے میں امریکی سیاست اور قومی سلامتی کے معاملات میں نمایاں شخصیت کے طور پر ابھری تھیں۔

صدر ڈونلڈ ٹرمپ کے مطابق تلسی گبارڈ 30 جون کو باضابطہ طور پر اپنا عہدہ چھوڑ دیں گی، جبکہ ڈپٹی ڈائریکٹر نیشنل انٹیلی جنس آرون لوکاس عبوری ڈائریکٹر کے فرائض انجام دیں گے۔