ٹرمپ کا بڑا دعویٰ: ایران کے ساتھ معاہدے پر اتوار کو دستخط ہوں گے، آبنائے ہرمز بھی کھول دی جائے گی

(واشنگٹن) امریکی صدر ڈونلڈ ٹرمپ نے دعویٰ کیا ہے کہ امریکا اور ایران کے درمیان مجوزہ معاہدے پر اتوار کے روز دستخط متوقع ہیں، جبکہ معاہدے کے فوراً بعد آبنائے ہرمز کو بھی بحری آمدورفت کے لیے کھول دیا جائے گا۔

واشنگٹن سے جاری اپنے بیان میں صدر ٹرمپ نے کہا کہ معاہدے کے بعد خطے میں حالات معمول پر آ جائیں گے اور مناسب وقت آنے پر جوہری مواد کی باقیات کو بھی محفوظ تحویل میں لے لیا جائے گا۔

امریکی صدر کا کہنا تھا کہ ان کی انتظامیہ کے ایران کے ساتھ تعلقات ماضی کی امریکی حکومتوں کے مقابلے میں زیادہ بہتر اور مؤثر ہیں۔ انہوں نے اس تاثر کو بھی مسترد کیا کہ معاہدے کے تحت ایران کو جنگی نقصانات یا حملوں کے نتیجے میں کسی قسم کا مالی ہرجانہ ادا کیا جائے گا۔

ڈونلڈ ٹرمپ نے مزید دعویٰ کیا کہ ایران اب جوہری ہتھیار حاصل کرنے کا خواہش مند نہیں رہا اور معاہدے کے بعد وہ نہ صرف ان ہتھیاروں کی تیاری بلکہ خریداری یا کسی اور ذریعے سے ان کے حصول کی کوشش بھی نہیں کر سکے گا۔

واضح رہے کہ دو روز قبل بھی امریکی صدر نے کہا تھا کہ امریکا اور ایران کے درمیان جاری مذاکرات فیصلہ کن مرحلے میں داخل ہو چکے ہیں اور مجوزہ معاہدے کی دستاویزات تقریباً حتمی شکل اختیار کر چکی ہیں۔ تاہم، ایران کی جانب سے ان دعوؤں پر تاحال کوئی باضابطہ ردعمل سامنے نہیں آیا۔