امریکا نے چین، بھارت، روس اور ایران کے اداروں پر نئی پابندیاں عائد کر دیں

(واشنگٹن )امریکا نے ایران سے متعلق پابندیوں کے دائرہ کار کو مزید وسیع کرتے ہوئے چین، بھارت، روس اور ایران کے متعدد اداروں پر نئی پابندیاں عائد کر دی ہیں۔

خبر ایجنسی کے مطابق امریکی محکمہ خزانہ نے اعلان کیا ہے کہ ایران کی فضائی کمپنی ماہان ایئر سے مبینہ تعلقات کے الزام میں مختلف ممالک کے کئی اداروں کو پابندیوں کی فہرست میں شامل کیا گیا ہے۔

رپورٹس کے مطابق چین اور بھارت کی تین ٹریول اور لاجسٹکس کمپنیوں پر بھی امریکی پابندیاں نافذ کی گئی ہیں، جبکہ ایک روسی کارگو کمپنی اور ایک ایرانی اسٹارٹ اپ اسٹوڈیو بھی ان اداروں میں شامل ہیں جنہیں نئی پابندیوں کا سامنا کرنا پڑا ہے۔

امریکی حکام کا کہنا ہے کہ ان اقدامات کا مقصد ایران کے مبینہ لاجسٹک اور مالیاتی نیٹ ورک کو محدود کرنا اور پابندیوں کے نفاذ کو مزید مؤثر بنانا ہے۔

واضح رہے کہ ایک روز قبل بھی ٹرمپ انتظامیہ نے ایران کے خلاف پابندیوں کے نئے مرحلے کا اعلان کیا تھا، جس کے تحت 8 تیل بردار جہازوں اور 10 مختلف اداروں کو امریکی پابندیوں کی فہرست میں شامل کیا گیا تھا۔

تجزیہ کاروں کے مطابق امریکا کی تازہ پابندیاں ایسے وقت میں سامنے آئی ہیں جب مشرق وسطیٰ میں کشیدگی برقرار ہے، اور ان اقدامات کے عالمی تجارت، توانائی کی منڈیوں اور علاقائی سفارتی تعلقات پر اثرات مرتب ہونے کا امکان ظاہر کیا جا رہا ہے۔