دوحہ میں ایران امریکا مذاکرات میں پیشرفت، پاکستان اور قطر کی ثالثی رنگ لے آئی

(دوحہ)پاکستان اور قطر کی ثالثی میں ایران اور امریکا کے درمیان ہونے والے مذاکرات میں مثبت پیشرفت سامنے آئی ہے، جہاں دونوں فریقوں نے سفارتی عمل جاری رکھنے اور آئندہ مذاکرات کے انعقاد پر اتفاق کیا ہے۔

قطر کی وزارت خارجہ کے ترجمان کی جانب سے جاری بیان کے مطابق دوحہ میں ہونے والے مذاکرات کے دوران مختلف امور، بالخصوص مفاہمتی یادداشت سے متعلق نکات پر تفصیلی تبادلہ خیال کیا گیا۔

بیان میں کہا گیا کہ قطری اور پاکستانی ثالثوں نے ایرانی اور امریکی وفود کے ساتھ علیحدہ علیحدہ ملاقاتیں کیں، جن کے دوران متعدد معاملات پر پیشرفت ہوئی۔ دونوں فریقوں نے اختلافات کو مذاکرات کے ذریعے حل کرنے کے عزم کا اعادہ کرتے ہوئے بات چیت کا سلسلہ جاری رکھنے پر اتفاق کیا۔

قطری وزارت خارجہ کے مطابق مذاکرات کا اگلا دور جلد منعقد کیا جائے گا، تاہم اس کی حتمی تاریخ ایران کے سابق سپریم لیڈر کی آخری رسومات کے بعد طے کی جائے گی۔

ترجمان نے مزید کہا کہ یہ مذاکرات خطے میں کشیدگی کم کرنے، باہمی اعتماد کو فروغ دینے اور سفارتی عمل کو آگے بڑھانے کی وسیع تر کوششوں کا حصہ ہیں، جن سے علاقائی استحکام کے امکانات کو تقویت مل سکتی ہے۔