پاکستان اور سعودی عرب میں سفارتی و سرکاری پاسپورٹ پر ویزا شرائط ختم

پاکستان اور سعودی عرب کے درمیان سفارتی اور سرکاری پاسپورٹ رکھنے والے افراد کے لیے ویزا شرائط ختم کرنے کا معاہدہ طے پا گیا ہے۔

نائب وزیراعظم و وزیر خارجہ اسحاق ڈار اور سعودی وزیر خارجہ شہزادہ فیصل بن فرحان کے درمیان نیویارک میں ملاقات ہوئی، جس کے دوران دونوں ممالک نے ویزا شرائط کے خاتمے کے معاہدے پر دستخط کیے۔

اسحاق ڈار نے کہا کہ معاہدے کا مقصد اعلیٰ سطح کے روابط اور ادارہ جاتی تبادلوں کو مزید سہولت فراہم کرنا ہے۔ دونوں برادر ممالک باہمی مفاد میں اپنی شراکت داری کو مزید وسعت دیں گے۔

انہوں نے کہا کہ سفارتی اور سرکاری پاسپورٹ رکھنے والوں کے لیے ویزا شرائط ختم ہونے سے دونوں ممالک کے درمیان سرکاری سطح پر آمدورفت مزید آسان ہوگی اور دوطرفہ روابط کو فروغ ملے گا۔