ایران کی امریکا کو وارننگ، جنگ بندی یا اسرائیل میں سے ایک راستہ چننا ہوگا: عباس عراقچی

(تہران)سوشل میڈیا پر جاری بیان میں عباس عراقچی نے کہا کہ ایران اور امریکا کے درمیان جنگ بندی کی شرائط واضح اور دوٹوک ہیں، اب فیصلہ امریکا کو کرنا ہوگا۔ انہوں نے کہا کہ گیند اب امریکا کے کورٹ میں ہے اور دنیا دیکھ رہی ہے کہ امریکا اپنی بات پر قائم رہتا ہے یا نہیں۔

ایرانی وزیر خارجہ نے مزید کہا کہ جنگ بندی کے لیے اعتماد سازی ضروری ہے اور اگر امریکا بیک وقت اسرائیل کے ذریعے کشیدگی بڑھاتا رہا تو مذاکرات آگے نہیں بڑھ سکیں گے۔

دوسری جانب ایرانی پارلیمنٹ کے اسپیکر محمد باقر قالیباف نے بھی جنگ بندی معاہدے کی خلاف ورزیوں پر شدید تشویش کا اظہار کیا ہے۔ انہوں نے کہا کہ مذاکرات شروع ہونے سے پہلے ہی 10 نکاتی تجویز کی تین شقوں کی خلاف ورزی ہو چکی ہے۔

سوشل میڈیا پیغام میں محمد باقر قالیباف کا کہنا تھا کہ جنگ بندی سے متعلق پہلی شق پر بھی عملدرآمد نہیں ہو رہا، جبکہ مذاکرات یا جنگ بندی کے دوران ایسی صورتحال کسی بھی طور مناسب نہیں۔

تجزیہ کاروں کے مطابق ایران کے حالیہ بیانات سے ظاہر ہوتا ہے کہ خطے میں کشیدگی کم ہونے کے بجائے مزید بڑھ سکتی ہے اور ایران امریکا مذاکرات کو شدید دباؤ کا سامنا ہے۔