معرکہ حق میں سری نگر سے بھٹنڈا تک دشمن کو ذلت آمیز سبق سکھایا، ایئرچیف مارشل ظہیر احمد بابر سدھو

(اسلام آباد) معرکہ حق کے ایک سال مکمل ہونے پر ایئرہیڈکوارٹرز اسلام آباد میں منعقدہ تقریب سے خطاب کرتے ہوئے ایئرچیف مارشل ظہیر احمد بابر سدھو نے کہا ہے کہ قومی دفاع میں پاک فضائیہ کا کردار تاریخی حیثیت رکھتا ہے اور معرکہ حق میں اس نے دشمن کو مؤثر اور فیصلہ کن جواب دیا۔

ایئرچیف کے مطابق معرکہ حق کے دوران سرینگر سے بھٹنڈا تک مختلف اہداف کو نشانہ بنایا گیا اور دشمن کو واضح پیغام دیا گیا۔ انہوں نے دعویٰ کیا کہ پاک فضائیہ نے جدید جنگی حکمت عملی کے ذریعے فضائی میدان میں برتری ثابت کی۔

خطاب میں ایئرچیف نے کہا کہ پاکستان نے پہلگام فالس فلیگ واقعے کے بعد بھارت کو غیر جانبدارانہ تحقیقات کی پیشکش کی تھی، تاہم اس کے باوجود پاکستان پر بے بنیاد الزامات عائد کیے گئے۔

انہوں نے کہا کہ پاک فضائیہ نے بھارتی جارحیت کا بھرپور اور منہ توڑ جواب دیا اور معرکہ حق میں نمایاں کامیابیاں حاصل کیں۔دشمن کی تمام تنصیبات پاک فضائیہ کے نشانے پر تھیں، ایس 400 ائیر ڈیفنس سسٹم کو لمحوں میں تباہ کردیا

ایئرچیف مارشل نے دعویٰ کیا کہ پاک فضائیہ نے دنیا کے جدید ترین لڑاکا طیاروں کو مؤثر انداز میں نشانہ بنایا اور دشمن کی فضائی صلاحیتوں کو نقصان پہنچایا۔ ان کے مطابق سائبر وار فیئر کے میدان میں بھی پاکستانی سائبر ٹیموں نے اہم کردار ادا کیا۔

انہوں نے کہا کہ پاک فضائیہ نے فضائی، الیکٹرانک اور سائبر جنگ کے شعبوں میں مربوط حکمت عملی کے تحت کارروائیاں کیں اور ریکارڈ وقت میں اہداف حاصل کیے۔

ایئرچیف کے مطابق معرکہ حق میں پاک فضائیہ کے ہر جوان نے غیر معمولی مہارت اور عزم کا مظاہرہ کیا اور ملک کے دفاع کو مضبوط بنایا۔

تقریب کے اختتام پر انہوں نے پاک فضائیہ کے اہلکاروں کو کامیاب آپریشنز پر مبارکباد دیتے ہوئے کہا کہ فضائیہ ملک کی فضائی سرحدوں کی محافظ ہے اور ہر ممکن خطرے کا مؤثر جواب دینے کی صلاحیت رکھتی ہے۔