ایران سے دوبارہ جنگ کیلئے تیار ہیں، نیتن یاہو کی سخت دھمکی

(تل ابیب)اپنے بیان میں نیتن یاہو نے کہا کہ اسرائیل کے مزید اہداف ہیں جنہیں یا تو معاہدے کے ذریعے یا جنگ دوبارہ شروع کرکے حاصل کیا جائے گا۔ انہوں نے واضح کیا کہ ایران کے ساتھ جنگ بندی میں حزب اللہ شامل نہیں ہے۔

اسرائیلی وزیر اعظم نے کہا کہ اسرائیل ایران کے خلاف جنگ دوبارہ شروع کرنے کیلئے تیار ہے اور ہماری انگلیاں ٹریگر پر ہیں۔ انہوں نے مزید کہا کہ چاہے معاہدے کے ذریعے ہو یا طاقت کے استعمال سے، ایران کا افزودہ یورینیم ختم کر دیا جائے گا۔

نیتن یاہو کا کہنا تھا کہ جنگ بندی کا معاہدہ اسرائیل کے مکمل تعاون سے کیا گیا تاہم یہ جنگ کا اختتام نہیں بلکہ ایک عارضی مرحلہ ہے۔

تجزیہ کاروں کے مطابق اسرائیلی وزیر اعظم کے اس بیان سے خطے میں کشیدگی مزید بڑھنے کا خدشہ پیدا ہوگیا ہے جبکہ ایران اور اسرائیل کے درمیان دوبارہ تصادم کے امکانات بھی بڑھ گئے ہیں۔