چین کی تردید، تحویل میں لیا گیا بحری جہاز ایران کیلئے تحفہ نہیں تھا

(بیجنگ) چین نے ڈونلڈ ٹرمپ کے اس دعوے کو مسترد کر دیا ہے جس میں کہا گیا تھا کہ تحویل میں لیا گیا بحری جہاز ایران کیلئے تحفہ تھا۔

چینی وزارت خارجہ کے ترجمان نے وضاحت کرتے ہوئے کہا کہ مذکورہ جہاز ایک غیر ملکی کنٹینر شپ تھا جسے امریکا نے اپنی تحویل میں لیا، اور اس کا ایران سے بطور تحفہ کوئی تعلق نہیں تھا۔ انہوں نے کہا کہ چین کسی بھی بدنیتی پر مبنی تعلق جوڑنے اور بے بنیاد قیاس آرائیوں کی سختی سے مخالفت کرتا ہے۔

ترجمان کا کہنا تھا کہ چین ایک بڑی عالمی طاقت کے طور پر ہمیشہ اپنی بین الاقوامی ذمہ داریاں پوری کرتا آیا ہے اور ذمہ دارانہ طرز عمل اپناتا ہے۔

انہوں نے خبردار کیا کہ خطے کی صورتحال اس وقت جنگ اور امن کے درمیان ایک نازک مرحلے میں داخل ہو چکی ہے، لہٰذا کشیدگی کو مزید بڑھنے سے روکنے کیلئے تمام فریقین کو سنجیدہ کوششیں کرنا ہوں گی۔

چینی مؤقف کے مطابق ایران اور امریکاکے درمیان جاری تنازع کا حل صرف سیاسی اور سفارتی ذرائع سے ہی ممکن ہے، اور اسی راستے کو اختیار کیا جانا چاہیے۔