جارحیت جاری رہی تو پورا خطہ امریکا و اسرائیل کیلئے جہنم بنا دیں گے: ایران کی سخت وارننگ

(ایران) ایران کے خاتم الانبیاء سینٹرل ہیڈکوارٹرز کے ترجمان ابراہیم ذوالفقاری نے اپنے بیان میں کہا کہ ایران کے خلاف مزید جارحیت کا جواب پورے خطے میں شدید ردعمل کی صورت میں دیا جائے گا۔ انہوں نے کہا کہ ایران کو شکست دینے کا تصور اب ایک دلدل میں بدل چکا ہے جس میں مخالفین خود پھنس جائیں گے۔

ابراہیم ذوالفقاری نے مزید کہا کہ ایران اپنی دفاعی صلاحیتوں کو بھرپور انداز میں استعمال کرے گا اور دشمن کو ہر محاذ پر سخت جواب دیا جائے گا۔ ان کا کہنا تھا کہ ایران خطے میں استحکام چاہتا ہے لیکن اگر جنگ مسلط کی گئی تو بھرپور جواب دیا جائے گا۔

دوسری جانب خاتم الانبیاء سینٹرل ہیڈکوارٹرز کے کمانڈر علی عبداللہی نے بھی سخت بیان دیتے ہوئے کہا کہ اگر ایران کے خلاف جارحیت جاری رہی تو امریکا اور اسرائیل کیلئے جہنم کے دروازے کھول دیے جائیں گے۔ انہوں نے خبردار کیا کہ ایران خطے میں اپنے اتحادیوں کے ساتھ مل کر وسیع ردعمل دینے کی صلاحیت رکھتا ہے۔

یہ بیانات ایسے وقت میں سامنے آئے ہیں جب امریکی صدر ڈونلڈ ٹرمپ نے ایران کو 48 گھنٹوں کا الٹی میٹم دیتے ہوئے کہا کہ ایران یا تو معاہدہ کرے یا آبنائے ہرمز کھول دے، بصورت دیگر ایران پر سخت کارروائی کی جائے گی۔

خطے میں بڑھتی کشیدگی کے باعث عالمی برادری میں تشویش بڑھ گئی ہے جبکہ ماہرین کا کہنا ہے کہ صورتحال مزید بگڑنے کی صورت میں مشرق وسطیٰ میں بڑے پیمانے پر تصادم کا خطرہ پیدا ہو سکتا ہے۔