پی آئی اے نے رعایتیں ختم کر دیں، بیجنگ اور کوالالمپور سمیت متعدد پروازیں معطل

(اسلام آباد)ترجمان پی آئی اے کے مطابق ایئرلائن نے اصولی طور پر تمام ڈسکاؤنٹس ختم کرنے کا فیصلہ کیا ہے، تاہم بچوں اور نوزائیدہ مسافروں کو دی جانے والی رعایت بدستور برقرار رہے گی۔

پی آئی اے نے بیجنگ اور کوالالمپور کے لیے اپنی پروازیں بالترتیب 11 اور 14 اپریل سے معطل کرنے کا اعلان کیا ہے، جبکہ خلیجی ممالک (متحدہ عرب امارات اور سعودی عرب کے علاوہ) کے لیے پروازیں بھی اپریل کے آخر تک بند رکھنے کا فیصلہ کیا گیا ہے۔

ترجمان کے مطابق متحدہ عرب امارات کے لیے فضائی آپریشن محدود کرتے ہوئے ہفتہ وار پروازوں کی تعداد 16 تک کر دی گئی ہے۔

پی آئی اے حکام کا کہنا ہے کہ جیٹ فیول کی قیمتوں میں مسلسل چوتھی بار اضافے کے باعث یہ اقدامات ناگزیر ہو گئے تھے، کیونکہ تمام مالی بوجھ مسافروں پر منتقل کرنا ممکن نہیں۔

ایئرلائن انتظامیہ نے امید ظاہر کی ہے کہ عالمی سطح پر ایندھن کی قیمتیں جلد معمول پر آ جائیں گی، جس کے بعد معطل روٹس بحال کر دیے جائیں گے اور آپریشن معمول کے مطابق جاری رکھا جائے گا۔