پنجاب میں مارکیٹس رات 8 بجے بند کرنے کی تجویز مسترد، رات 10 بجے تک کھلی رکھنے پر اتفاق

(لاہور)ذرائع کے مطابق وزیراعلیٰ پنجاب مریم نواز کو مارکیٹس کے اوقات کم کرنے سے متعلق مختلف سفارشات پیش کی گئیں، تاہم ان سفارشات کو منظور نہیں کیا جا سکا۔ حکومت پنجاب کا مؤقف ہے کہ موجودہ معاشی حالات میں تاجروں کو مزید دباؤ میں ڈالنا مناسب نہیں، اسی لیے کاروباری اوقات میں فوری کمی کا فیصلہ مؤخر کر دیا گیا ہے۔

حکومتی ذرائع کا کہنا ہے کہ مارکیٹس جلد بند کرنے کی تجویز فی الحال مؤخر کر دی گئی ہے اور اس حوالے سے مزید مشاورت کا عمل جاری رہے گا۔ اس سلسلے میں تاجر تنظیموں اور کاروباری نمائندوں سے رابطے کیے جا رہے ہیں تاکہ باہمی اتفاق رائے سے حتمی فیصلہ کیا جا سکے۔

دوسری جانب پنجاب حکومت نے کفایت شعاری پالیسی پر سختی سے عملدرآمد کی ہدایت بھی جاری کر دی ہے۔ حکومتی ذرائع کے مطابق اس حوالے سے ایک اور اہم اجلاس جلد متوقع ہے، جس میں توانائی بچت اور دیگر معاشی اقدامات کا جائزہ لیا جائے گا۔

واضح رہے کہ توانائی بحران اور معاشی دباؤ کے پیش نظر مارکیٹس کے اوقات کم کرنے کی تجویز زیر غور تھی، تاہم تاجروں کے تحفظات کو مدنظر رکھتے ہوئے فی الحال اس پر عملدرآمد روک دیا گیا ہے۔