واشنگٹن مایوسی کا شکار، نئی پابندیاں بھی تہران کو شکست دینے میں ناکام رہیں گی: عراقچی

ایرانی وزیر خارجہ عباس عراقچی نے نئی امریکی پابندیوں کی دھمکی کو مسترد کرتے ہوئے کہا ہے کہ واشنگٹن مایوسی کا شکار ہے اور متوقع نئی پابندیاں بھی تہران کو شکست دینے میں ناکام رہیں گی۔

عباس عراقچی نے ٹیلی گرام پر جاری اپنے ویڈیو پیغام میں امریکی اقدامات کو بار بار دہرائے جانے والے ناکام منصوبوں سے تعبیر کیا۔ ان کا کہنا تھا کہ امریکی رہنماؤں کی جانب سے فوجی کارروائیوں سے آگے بڑھ کر ایک بار پھر انہی پرانے منصوبوں کی بات کرنا اس بات کی علامت ہے کہ واشنگٹن مایوسی کا شکار ہو چکا ہے۔

ایرانی وزیر خارجہ نے کہا کہ امریکا کو ایران کے ساتھ احترام کے ساتھ بات چیت کرنی چاہیے تاکہ انصاف اور باہمی عزت کی بنیاد پر کسی حل تک پہنچا جا سکے۔

انہوں نے مزید کہا کہ ایران کبھی خوفزدہ نہیں ہوا۔ عباس عراقچی کے مطابق ایران کے خلاف امریکی ناکہ بندیوں سمیت مختلف اقدامات اور فوجی کارروائیاں ماضی میں ناکام ہو چکی ہیں، جبکہ واشنگٹن کا نیا اقدام بھی ناکامی سے دوچار ہوگا۔