واشنگٹن ٹائمز: فیلڈ مارشل عاصم منیر نے امریکا ایران مذاکرات میں اہم کردار ادا کیا

امریکی اخبار واشنگٹن ٹائمز نے دعویٰ کیا ہے کہ سید عاصم منیر نے امریکا اور ایران کے درمیان جاری اختلافات ختم کرانے اور مذاکراتی عمل کو آگے بڑھانے میں اہم ترین کردار ادا کیا۔

رپورٹ کے مطابق فیلڈ مارشل عاصم منیر نے ایران اور امریکا کے درمیان مذاکرات میں ایک بڑے مصالحت کار کے طور پر کام کیا اور معاہدے کے مسودے کو حتمی شکل دینے کے لیے دونوں ممالک کی قیادت سے مسلسل رابطے اور ملاقاتیں کیں۔

ادھر نیویارک ٹائمز نے بھی فیلڈ مارشل عاصم منیر کے حالیہ دورۂ ایران کو اعلیٰ سطح کی سفارتکاری قرار دیتے ہوئے کہا کہ ایران اور امریکا کے درمیان مفاہمتی پیش رفت میں پاکستان نے کلیدی کردار ادا کیا۔

رپورٹس کے مطابق امریکا اور ایران کے درمیان جاری کشیدگی اور مختلف محاذوں پر تنازع کے خاتمے کے لیے امن معاہدے کو حتمی شکل دینے کا اعلان اتوار کی دوپہر تک متوقع ہے۔

واشنگٹن ٹائمز نے ذرائع کے حوالے سے مزید دعویٰ کیا کہ ہفتے کی صبح معاہدے کے مسودے پر اتفاق ہو چکا تھا اور اس کا باضابطہ اعلان 24 گھنٹوں کے اندر کیے جانے کا امکان ہے۔

مبصرین کے مطابق اگر یہ معاہدہ حتمی شکل اختیار کر لیتا ہے تو یہ خطے میں کشیدگی کم کرنے اور سفارتی تعلقات بہتر بنانے کی جانب ایک اہم پیش رفت ثابت ہو سکتا ہے۔