ایران سے سیز فائر کی کوئی حتمی ڈیڈ لائن نہیں، فیصلہ صدر کریں گے: کیرولین لیوٹ

(واشنگٹن) وائٹ ہاؤس کی ترجمان کیرولین لیوٹ نے کہا ہے کہ ایران کے ساتھ سیز فائر کے لیے کسی حتمی ڈیڈ لائن کا تعین نہیں کیا گیا اور اس حوالے سے وقت کا فیصلہ کمانڈر ان چیف خود کریں گے۔

میڈیا سے گفتگو کرتے ہوئے کیرولین لیوٹ نے بتایا کہ ایران کو متفقہ تجاویز پر غور کرنے کے لیے چند دن دیے جا رہے ہیں، جبکہ اس دوران عارضی جنگ بندی برقرار رہنے کا امکان ہے۔ ان کا کہنا تھا کہ ایران کی جانب سے دو جہازوں کو تحویل میں لینا صدر ٹرمپ کے نزدیک جنگ بندی کی خلاف ورزی تصور نہیں کیا جا رہا۔

ترجمان کے مطابق تحویل میں لیے گئے دونوں جہاز نہ تو امریکی ہیں اور نہ ہی اسرائیلی۔ انہوں نے واضح کیا کہ ایران کو لازمی طور پر افزودہ یورینیم حوالے کرنا ہوگا۔

کیرولین لیوٹ نے مزید کہا کہ صدر ٹرمپ آبنائے ہرمز میں ناکہ بندی کی صورتحال پر مطمئن ہیں اور امریکا کی معاشی دباؤ کی مہم کامیاب رہی ہے۔ ان کے بقول ایران اس وقت اپنے ملازمین کو تنخواہیں دینے کی پوزیشن میں بھی نہیں ہے۔

انہوں نے دوٹوک انداز میں کہا کہ امریکا اپنی شرائط میں کسی قسم کی نرمی نہیں کرے گا اور ایران کو عالمی مطالبات کے مطابق اقدامات اٹھانا ہوں گے۔