یوٹیوب نے ویوز گننے کا طریقہ تبدیل کردیا، نئی پالیسی 24 اگست سے نافذ ہوگی

کیلیفورنیا: یوٹیوب نے ویڈیوز کے ویوز گننے کے طریقہ کار میں اہم تبدیلی کا اعلان کردیا ہے، جس کے تحت طویل ویڈیوز کا پلے ہوتے ہی اسے ایک ویو شمار کیا جائے گا۔ نیا طریقہ کار 24 اگست سے نافذ ہوگا۔

یوٹیوب کے مطابق ماضی میں ویوز شمار کرنے کے لیے مختلف نظام استعمال کیے جاتے رہے ہیں، تاہم صارفین کی جانب سے موجودہ طریقہ کار میں پیچیدگی اور ابہام کی شکایات سامنے آتی رہی ہیں۔ اسی وجہ سے ویوز گننے کے لیے نیا نظام متعارف کرایا جا رہا ہے۔

نئے نظام کے تحت ویڈیو کے پلے ہوتے ہی ویو شمار ہوگا، جس کے نتیجے میں خاص طور پر ایسی ویڈیوز کے ویوز میں نمایاں اضافہ ہوسکتا ہے جنہیں صارفین مختصر وقت کے لیے دیکھتے ہیں۔

یوٹیوب نے واضح کیا ہے کہ پرانا ویو کاؤنٹ ختم نہیں ہوگا بلکہ اسے ’’انگیجڈ ویوز‘‘ کا نام دیا جائے گا۔ صارفین یوٹیوب کے اینالیٹکس ٹولز کے ذریعے ان اعداد و شمار کو دیکھ سکیں گے۔

کمپنی کے مطابق ویوز گننے کے طریقہ کار میں تبدیلی سے کریئیٹرز کی آمدنی یا یوٹیوب پارٹنر پروگرام میں شمولیت کی اہلیت متاثر نہیں ہوگی۔

یہ نیا طریقہ کار ٹک ٹاک اور انسٹاگرام کے موجودہ ویو کاؤنٹنگ سسٹم سے ملتا جلتا ہے، جہاں ویڈیو کے پلے ہوتے ہی اسے ویو شمار کیا جاتا ہے۔

یوٹیوب پارٹنر پروگرام کی شرائط بھی سخت

دوسری جانب یوٹیوب نے پلیٹ فارم سے آمدنی حاصل کرنے کے لیے پارٹنر پروگرام کی شرائط میں بھی تبدیلی کردی ہے۔

نئی شرائط کے تحت طویل ویڈیوز کے لیے مطلوبہ واچ ٹائم 4 ہزار گھنٹے سے بڑھا کر 8 ہزار گھنٹے کردیا جائے گا، جبکہ چینل پر کم از کم ایک ہزار سبسکرائبرز کی شرط برقرار رہے گی۔

شارٹس کے ذریعے پارٹنر پروگرام میں شمولیت کے لیے بھی ویوز کی حد بڑھائی گئی ہے۔ اب گزشتہ 90 دن میں 2 کروڑ شارٹس ویوز حاصل کرنا ہوں گے، جبکہ پہلے یہ شرط ایک کروڑ ویوز تھی۔

یہ نئی شرائط یکم فروری 2027 سے نافذ ہوں گی۔ گوگل کے مطابق جو صارفین پہلے ہی یوٹیوب پارٹنر پروگرام کا حصہ ہیں، وہ ان نئی شرائط سے متاثر نہیں ہوں گے۔