پی ایس ایل 11: اسلام آباد یونائیٹڈ کی شاندار فتح، کوئٹہ گلیڈی ایٹرز کو 8 وکٹوں سے شکست
شاداب خان کی آل راؤنڈ کارکردگی، 3 وکٹیں اور ناقابل شکست 69 رنز، مین آف دی میچ قرار
پاکستان سپر لیگ (پی ایس ایل) سیزن 11 میں اسلام آباد یونائیٹڈ نے شاندار کارکردگی کا مظاہرہ کرتے ہوئے کوئٹہ گلیڈی ایٹرز کو 8 وکٹوں سے شکست دے دی۔ لاہور کے قذافی اسٹیڈیم میں کھیلے گئے میچ میں اسلام آباد یونائیٹڈ نے 184 رنز کا ہدف با آسانی حاصل کر لیا۔
میچ میں کوئٹہ گلیڈی ایٹرز نے ٹاس جیت کر پہلے بیٹنگ کا فیصلہ کیا اور مقررہ 20 اوورز میں 5 وکٹوں کے نقصان پر 183 رنز اسکور کیے۔ کوئٹہ کی جانب سے کپتان سعود شکیل نے 42 جبکہ حسن نواز نے 66 رنز کی نمایاں اننگز کھیلی۔ اس کے علاوہ شامل حسین 21، خواجہ نافع 18 اور ٹام کرن 29 رنز بنا کر نمایاں رہے۔
اسلام آباد یونائیٹڈ کی جانب سے شاداب خان نے شاندار باؤلنگ کرتے ہوئے 3 کھلاڑیوں کو آؤٹ کیا اور ٹیم کو مضبوط پوزیشن دلائی۔
184 رنز کے ہدف کے تعاقب میں اسلام آباد یونائیٹڈ نے اعتماد کے ساتھ بیٹنگ کی اور مطلوبہ ہدف 19ویں اوور میں صرف 2 وکٹوں کے نقصان پر حاصل کر لیا۔ سمیر منہاس نے 82 رنز کی شاندار اننگز کھیلی جبکہ کپتان شاداب خان نے 69 رنز کی ناقابل شکست اننگز کھیل کر ٹیم کو فتح سے ہمکنار کیا۔
دونوں کھلاڑیوں کے درمیان تیسری وکٹ پر 128 رنز کی ناقابل شکست شراکت قائم ہوئی، جس نے میچ کا پانسہ اسلام آباد یونائیٹڈ کے حق میں پلٹ دیا۔ دیگر بلے بازوں میں ڈیون کونوے نے 18 جبکہ آندریس گوس 2 رنز بنا سکے۔
شاداب خان کو شاندار آل راؤنڈ کارکردگی پر مین آف دی میچ قرار دیا گیا۔ اسلام آباد یونائیٹڈ کی اس کامیابی کے بعد ٹیم کی پوزیشن پوائنٹس ٹیبل پر مزید مستحکم ہوگئی۔
Web Desk
Media Channel
شائع ہوا: 2 اپریل، 2026 کو 01:58 PM
آخری تدوین: 2 اپریل، 2026
