فیلڈ مارشل اور اسحاق ڈار کی کوششوں سے 2 جہاز پاکستان پہنچ گئے،

وزیراعظم شہباز شریف نے کہا ہے کہ ملک کو درپیش معاشی چیلنجز سے نمٹنے کے لیے کفایت شعاری مہم کو مزید تیز کیا جا رہا ہے، غریب طبقے کو تحفظ دینا اور امیروں کو قربانی دینا ہوگی۔ انہوں نے بتایا کہ آبنائے ہرمز میں پھنسے دو جہاز فیلڈ مارشل اور نائب وزیراعظم اسحاق ڈار کی کوششوں سے پاکستان پہنچ گئے ہیں۔

عالمی توانائی بحران اور خطے میں جاری کشیدگی کے تناظر میں وزیراعظم شہباز شریف کی زیر صدارت اعلیٰ سطح اجلاس منعقد ہوا جس میں فیلڈ مارشل، وزرائے اعلیٰ، نگران وزیراعلیٰ گلگت بلتستان اور وزیراعظم آزاد کشمیر نے شرکت کی۔

اجلاس سے خطاب کرتے ہوئے وزیراعظم شہباز شریف نے کہا کہ کفایت شعاری مہم کے لیے 139 ارب روپے مختص کیے گئے ہیں، سرکاری گاڑیوں کو گراؤنڈ کیا گیا ہے جبکہ ارکان اسمبلی دو ماہ کی تنخواہیں نہیں لیں گے۔ انہوں نے کہا کہ جنگ کے باعث پاکستان کو معاشی مشکلات کا سامنا ہے اور دیگر ممالک کی طرح پاکستان بھی اس کے اثرات سے متاثر ہو رہا ہے۔

وزیراعظم نے کہا کہ خطے میں جنگ دوسرے مہینے میں داخل ہو چکی ہے اور اس دوران ہونے والی شہادتوں پر گہرے دکھ کا اظہار کرتے ہیں۔ انہوں نے کہا کہ پاکستان نے ایران اور امریکا کے درمیان جنگ ختم کرانے کے لیے ہر ممکن سفارتی کوششیں کیں اور نائب وزیراعظم اسحاق ڈار اس سلسلے میں کلیدی کردار ادا کر رہے ہیں۔

شہباز شریف نے مزید کہا کہ آبنائے ہرمز میں موجود دو جہاز فیلڈ مارشل اور اسحاق ڈار کی کوششوں سے پاکستان پہنچے جبکہ انہوں نے بھرپور تعاون پر بلاول بھٹو کا بھی شکریہ ادا کیا۔

اجلاس میں خطے میں جاری کشیدگی کے باعث توانائی کے ممکنہ بحران پر بھی غور کیا گیا اور شرکاء کو توانائی بچت اور کفایت شعاری اقدامات سے متعلق بریفنگ دی گئی۔ پیٹرولیم مصنوعات کی قیمتوں سے متعلق اہم امور بھی زیر غور آئے۔

ذرائع کے مطابق وفاقی حکومت نے صوبوں سے پیٹرولیم مصنوعات پر سبسڈی میں حصہ ڈالنے پر زور دیا جبکہ قیمتوں میں اضافے کا بوجھ مخصوص صارفین پر منتقل کرنے کی تجویز بھی زیر غور آئی۔ اجلاس میں بیرونی سفارت کاری اور پاکستان کی ثالثی کوششوں کا بھی جائزہ لیا گیا۔