پیٹرولیم قیمتوں میں اضافہ لاہور ہائیکورٹ میں چیلنج، عالمی موازنہ بھی پیش

(لاہور) درخواست اظہر صدیق ایڈووکیٹ کی جانب سے دائر کی گئی، جس میں مؤقف اختیار کیا گیا ہے کہ حکومت نے پیٹرولیم قیمتوں میں اضافہ کسی واضح اور شفاف فارمولے کے بغیر کیا۔

درخواست گزار کے مطابق پاکستان میں پیٹرول کی قیمت 450 روپے فی لیٹر سے تجاوز کر چکی ہے، جو کئی ممالک کے مقابلے میں نمایاں طور پر زیادہ ہے۔ درخواست میں عالمی قیمتوں کا موازنہ پیش کرتے ہوئے بتایا گیا کہ امریکا میں پیٹرول تقریباً 250 روپے فی لیٹر جبکہ بھارت میں 290 سے 310 روپے کے درمیان ہے۔

اسی طرح ترکیہ، بنگلا دیش اور سری لنکا میں بھی پیٹرول کی قیمت پاکستان کے مقابلے میں کم بتائی گئی ہے، جبکہ متحدہ عرب امارات اور سعودی عرب میں یہ قیمتیں مزید کم ہیں۔

درخواست میں مؤقف اپنایا گیا ہے کہ کم آمدنی کے باوجود پاکستانی عوام پر سب سے زیادہ بوجھ ڈالا جا رہا ہے، جس سے مہنگائی میں شدید اضافہ ہوگا اور خوراک و ٹرانسپورٹ کے اخراجات بھی بڑھ جائیں گے۔

درخواست گزار نے عدالت سے استدعا کی ہے کہ پیٹرولیم قیمتوں میں اضافے کو کالعدم قرار دیا جائے اور فوری طور پر اس پر عملدرآمد معطل کیا جائے۔ مزید یہ بھی کہا گیا ہے کہ 15 دن کے موجودہ اسٹاک پر نئی قیمت کا اطلاق ناجائز منافع خوری کے زمرے میں آتا ہے۔

عدالت سے اس معاملے پر جلد سماعت کی درخواست بھی کی گئی ہے تاکہ عوام کو فوری ریلیف فراہم کیا جا سکے۔