ننکانہ صاحب میں بابا گورو نانک کے 557ویں جنم دن کی تقریبات کا آج سے آغاز

ننکانہ صاحب میں بابا گورو نانک کے 557ویں جنم دن کی تقریبات کا آج رات گوردوارہ جنم استھان میں اکھنڈ پاٹھ سے آغاز ہوگا، بھارت سمیت دنیا بھر سے سکھ یاتریوں کی آمد جاری ہے
ننکانہ صاحب میں سکھ مذہب کے بانی بابا گورو نانک دیو جی کے 557ویں جنم دن کی تقریبات کا آغاز آج رات گوردوارہ جنم استھان میں اکھنڈ پاٹھ کی مذہبی رسم سے ہوگا۔
جنم دن کی تقریبات تین روز تک جاری رہیں گی، جن میں شرکت کے لیے اندرون اور بیرون ملک سے سکھ یاتریوں کی آمد کا سلسلہ جاری ہے۔
بھارتی سکھ یاتری بھی ننکانہ صاحب پہنچیں گے
تقریبات میں شرکت کے لیے بھارتی سکھ یاتری بھی آج واہگہ بارڈر کے راستے پاکستان پہنچیں گے، جہاں سے انہیں ننکانہ صاحب لے جایا جائے گا۔
ضلعی انتظامیہ نے مذہبی تقریبات کے لیے تمام انتظامات مکمل کر لیے ہیں، جبکہ پنجاب حکومت کی جانب سے سکھ یاتریوں اور شرکا کی حفاظت کے لیے فول پروف سکیورٹی انتظامات کیے گئے ہیں۔
تعلیمی اداروں میں 25 نومبر تک تعطیلات
بابا گورو نانک کے 557ویں جنم دن کی تقریبات کے پیش نظر ننکانہ صاحب کے سرکاری اور نجی تعلیمی اداروں میں 25 نومبر تک تعطیلات کا اعلان کیا گیا ہے۔
واضح رہے کہ ننکانہ صاحب سکھ مذہب کے بانی بابا گورو نانک دیو جی کی جائے پیدائش ہے، جس کے باعث ہر سال ان کے جنم دن کے موقع پر دنیا بھر سے ہزاروں سکھ یاتری مذہبی رسومات اور تقریبات میں شرکت کے لیے پاکستان آتے ہیں۔
شائع ہوا: 22 نومبر، 2026 کو 07:19 AM
آخری تدوین: 22 نومبر، 2026



