ایران امریکا مذاکرات: کامیابی کی صورت میں معاہدے پر ڈیجیٹل دستخط ہوں گے، عباس عراقچی

(تہران) ایران کے وزیر خارجہ عباس عراقچی نے کہا ہے کہ امریکا کے ساتھ جاری مذاکرات کامیاب ہونے کی صورت میں مجوزہ معاہدے پر ڈیجیٹل طور پر دستخط کیے جائیں گے، جس کے بعد اس کا باضابطہ اعلان بھی کیا جائے گا۔

اپنے بیان میں عباس عراقچی کا کہنا تھا کہ دونوں ممالک کے درمیان جاری سفارتی رابطے مثبت سمت میں آگے بڑھ رہے ہیں اور اگر مذاکرات کامیابی سے ہمکنار ہوتے ہیں تو معاہدے کو جدید ڈیجیٹل طریقہ کار کے تحت حتمی شکل دی جائے گی۔

ایرانی وزیر خارجہ نے واضح کیا کہ مجوزہ عبوری معاہدہ دراصل اعتماد سازی کی جانب پہلا قدم ہے، جو مستقبل میں جامع جوہری مذاکرات کی راہ ہموار کرے گا۔ ان کا کہنا تھا کہ اگر یہ عبوری معاہدہ مؤثر انداز میں نافذ نہ ہو سکا تو باقاعدہ جوہری مذاکرات کا آغاز ممکن نہیں ہوگا۔

عباس عراقچی کے اس بیان کو ایران اور امریکا کے درمیان جاری سفارتی کوششوں میں اہم پیش رفت قرار دیا جا رہا ہے۔ اس سے قبل امریکی صدر ڈونلڈ ٹرمپ بھی عندیہ دے چکے ہیں کہ دونوں ممالک کے درمیان مجوزہ معاہدہ حتمی مراحل میں داخل ہو چکا ہے۔

تجزیہ کاروں کے مطابق اگر دونوں فریق عبوری معاہدے پر متفق ہو جاتے ہیں تو اس سے نہ صرف خطے میں کشیدگی میں کمی آئے گی بلکہ ایران کے جوہری پروگرام سے متعلق طویل عرصے سے جاری تنازع کے حل کی جانب بھی ایک اہم پیش رفت ہوگی۔