پاکستان بمقابلہ سری لنکا فائنل کل لاہور میں، شاہین آفریدی اور کوشل مینڈس کا ٹرافی جیتنے کا عزم

لاہور: پاکستان اور سری لنکا کے درمیان تین ملکی ون ڈے انٹرنیشنل سیریز کا فائنل کل قذافی اسٹیڈیم لاہور میں کھیلا جائے گا۔ فیصلہ کن مقابلہ دوپہر ایک بجے شروع ہوگا، جس میں دونوں ٹیمیں ٹرافی اپنے نام کرنے کے لیے میدان میں اتریں گی۔

فائنل سے قبل دونوں ٹیموں کے کپتانوں شاہین شاہ آفریدی اور کوشل مینڈس نے گورنر ہاؤس لاہور میں ٹرافی شوٹ میں شرکت کی۔

پاکستانی ٹیم کی قیادت شاہین شاہ آفریدی کریں گے جبکہ سری لنکن ٹیم کی کپتانی کوشل مینڈس کے سپرد ہے۔ پاکستان نے تین ملکی سیریز میں اب تک شاندار کارکردگی کا مظاہرہ کرتے ہوئے انگلینڈ کے خلاف دو جبکہ سری لنکا کے خلاف ایک میچ میں کامیابی حاصل کی ہے۔

فائنل سے قبل گفتگو کرتے ہوئے قومی ٹیم کے کپتان شاہین شاہ آفریدی نے کہا کہ ٹیم نے مجموعی طور پر اچھی کارکردگی دکھائی ہے، تاہم بعض شعبوں میں مزید بہتری کی ضرورت ہے۔ ٹاپ آرڈر کو زیادہ رنز بنانے اور بڑی شراکتیں قائم کرنے پر توجہ دینا ہوگی۔

شاہین آفریدی کا کہنا تھا کہ پاکستانی شائقین نے ہمیشہ ٹیم کی بھرپور حوصلہ افزائی کی ہے اور انہیں امید ہے کہ فائنل میں بھی بڑی تعداد میں شائقین اسٹیڈیم پہنچ کر قومی ٹیم کو سپورٹ کریں گے۔ انہوں نے فائنل میں اچھی کارکردگی دکھانے کے عزم کا اظہار بھی کیا۔

دوسری جانب سری لنکن کپتان کوشل مینڈس نے فائنل کو اپنی ٹیم کے لیے بڑا اور اہم مقابلہ قرار دیتے ہوئے کہا کہ پاکستان نے حالیہ میچوں میں اچھی کرکٹ کھیلی ہے، تاہم سری لنکن ٹیم نے بھی فیصلہ کن میچ کے لیے بھرپور تیاری کی ہے اور مقابلے کی منتظر ہے۔

کوشل مینڈس کا کہنا تھا کہ پاکستان کے خلاف گزشتہ میچ میں ان کی ٹیم کی کارکردگی اچھی رہی تھی اور سری لنکا میں شائقین ٹیم کی مجموعی کارکردگی سے بہت خوش ہیں۔

انہوں نے پاکستانی شائقین کی جانب سے سری لنکن کھلاڑیوں کو ملنے والی حمایت کو بھی سراہا۔

اب تمام نظریں قذافی اسٹیڈیم لاہور پر لگی ہیں، جہاں پاکستان اور سری لنکا کے درمیان ٹرافی کے حصول کے لیے دلچسپ اور سنسنی خیز مقابلے کی توقع ہے۔