ہم ابھی تک پرفیکٹ گیم نہیں کھیل سکے، فائنل میں کامیابی کے لیے پُرعزم ہیں: سلمان علی آغا

لاہور: قومی کرکٹ ٹیم کے آل راؤنڈر سلمان علی آغا نے اعتراف کیا ہے کہ پاکستان اب تک تین ملکی ون ڈے سیریز میں اپنی بہترین کرکٹ نہیں کھیل سکا، تاہم ٹیم فائنل میں کامیابی حاصل کرنے کے لیے پُرعزم ہے۔

لاہور میں نیوز کانفرنس کرتے ہوئے سلمان علی آغا نے کہا کہ انہیں حیرت ہوتی ہے جب لوگ یہ کہتے ہیں کہ پاکستانی ٹیم سنجیدگی سے نہیں کھیل رہی۔ ان کا کہنا تھا کہ ماضی میں بھی ان پر غیر سنجیدگی کے الزامات لگائے جاتے رہے ہیں۔

انہوں نے کہا کہ ٹیم کے بعض بیٹرز اب تک رنز نہیں بنا سکے، تاہم امید ہے کہ وہ فائنل میں اچھی کارکردگی دکھائیں گے۔ کپتان کے طور پر دباؤ ضرور ہوتا ہے، لیکن اب وہ پہلے کی نسبت کم دباؤ محسوس کرتے ہیں۔ انہوں نے شائقین سے اپیل کی کہ وہ فائنل میں بھی قومی ٹیم کی بھرپور حوصلہ افزائی کریں۔

سلمان علی آغا نے فخر زمان اور بابر اعظم کی حمایت کرتے ہوئے کہا کہ دونوں کھلاڑی گزشتہ دس برس سے ون ڈے کرکٹ کے بہترین بیٹرز میں شامل ہیں اور پاکستان کو کئی بڑی سیریز جتوا چکے ہیں۔ فخر زمان فائنل میں اچھے رنز کرتے ہیں اور انہیں امید ہے کہ فخر زمان اور بابر اعظم فیصلہ کن مقابلے میں بھی رنز بنائیں گے۔

قومی آل راؤنڈر کا کہنا تھا کہ جن پچز پر ٹیم نے میچز کھیلے، وہاں اتنے ہی رنز بن سکتے تھے اور پاکستانی ٹیم نے ان اسکورز کا دفاع بھی کیا۔ تاہم بیٹرز کو اپنی نصف سنچریوں کو بڑی اننگز میں تبدیل کرنا ہوگا۔ اگر ایسا ہوا تو پاکستان 350 سے زائد رنز بھی اسکور کرسکتا ہے۔

انہوں نے شاداب خان اور حارث رؤف کی بیٹنگ کو بھی سراہتے ہوئے کہا کہ دونوں نے شاندار بیٹنگ کی اور دباؤ میں اپنے اعصاب پر قابو رکھا۔ ایسے سنسنی خیز مقابلے روز روز دیکھنے کو نہیں ملتے۔

سیریز کے دوران کھلاڑیوں کو ڈراپ کرنے کے معاملے پر سلمان علی آغا نے کہا کہ یہ اچھی بات نہیں ہے اور ان کے خیال میں اس سے پہلے ایسا کبھی نہیں ہوا۔ انہیں امید ہے کہ مستقبل میں اس طرح کی صورتحال دوبارہ پیدا نہیں ہوگی۔

موجودہ ون ڈے کرکٹ کے رجحان پر بات کرتے ہوئے سلمان علی آغا نے کہا کہ آج کے دور میں ٹیموں کو 350 رنز سے زائد کا ہدف دینے کی ضرورت ہوتی ہے۔

انہوں نے مزید کہا کہ راولپنڈی میں بھی شائقین نے اسٹیڈیم کو بھر دیا تھا اور امید ہے کہ لاہور میں بھی فائنل کے دوران اسٹیڈیم ہاؤس فل ہوگا۔