ہانگ کانگ سکسز: پاکستان کو یو اے ای کے ہاتھوں ایک وکٹ سے شکست

ہانگ کانگ: ہانگ کانگ سکسز ٹورنامنٹ میں دفاعی چیمپئن پاکستان کو اپنے پہلے ہی میچ میں متحدہ عرب امارات (یو اے ای) کے ہاتھوں سنسنی خیز مقابلے کے بعد ایک وکٹ سے شکست کا سامنا کرنا پڑا۔ یو اے ای نے 107 رنز کا ہدف آخری اوور میں حاصل کرکے کامیابی اپنے نام کرلی۔

ہانگ کانگ کے مشن روڈ گراؤنڈ میں کھیلے گئے گروپ سی کے اس مقابلے میں پاکستان نے ٹاس جیت کر پہلے بیٹنگ کا فیصلہ کیا اور مقررہ 6 اوورز میں 3 وکٹوں کے نقصان پر 106 رنز بنائے۔

پاکستان کی جانب سے کپتان عباس آفریدی نے جارحانہ بیٹنگ کا مظاہرہ کرتے ہوئے صرف 13 گیندوں پر 53 رنز اسکور کیے۔ ان کی اننگز میں ایک چوکا اور 8 چھکے شامل تھے۔ عبدالصمد نے بھی شاندار بیٹنگ کرتے ہوئے 15 گیندوں پر 39 رنز کی ناقابلِ شکست اننگز کھیلی۔

106 رنز کے ہدف کے تعاقب میں متحدہ عرب امارات کی ٹیم نے بھرپور مزاحمت کی اور 6 اوورز میں 5 وکٹوں کے نقصان پر 109 رنز بنا کر میچ ایک وکٹ سے جیت لیا۔

یو اے ای کے کپتان خالد شاہ پاکستانی بولرز کے لیے مشکلات پیدا کرتے رہے۔ انہوں نے محض 20 گیندوں پر 71 رنز کی دھواں دار اننگز کھیلی، جس میں 3 چوکے اور 9 چھکے شامل تھے۔ زاہد علی نے بھی 8 گیندوں پر 22 رنز بنا کر ٹیم کی کامیابی میں اہم کردار ادا کیا۔

پاکستان کی جانب سے عباس آفریدی، عبدالصمد اور عرفان خان نے ایک، ایک وکٹ حاصل کی، تاہم پاکستانی بولرز یو اے ای کو ہدف تک پہنچنے سے روکنے میں کامیاب نہ ہوسکے۔

اس شکست کے بعد پاکستان کو گروپ سی میں اپنی پوزیشن بہتر بنانے کے لیے اگلے مقابلے میں کامیابی درکار ہوگی۔ پاکستان کا اگلا مقابلہ روایتی حریف بھارت کے خلاف شیڈول ہے، جو ہانگ کانگ کے مقامی وقت کے مطابق دوپہر 2 بج کر 15 منٹ پر، جبکہ پاکستانی وقت کے مطابق تقریباً صبح 11 بج کر 15 منٹ پر کھیلا جائے گا۔