ایران نے جنگ بندی معاہدے کی مکمل پاسداری کی، امریکا خلاف ورزی کر رہا ہے: عباس عراقچی

(تہران) ایران کے وزیر خارجہ عباس عراقچی نے کہا ہے کہ تہران نے امریکا کے ساتھ ہونے والے جنگ بندی معاہدے کے تحت اپنے تمام وعدے پورے کیے ہیں، تاہم امریکا معاہدے کی خلاف ورزی کر رہا ہے۔

عباس عراقچی نے سوشل میڈیا پلیٹ فارم ایکس پر جاری اپنے بیان میں کہا کہ ایران نے اب تک جنگ بندی سے متعلق اپنی تمام ذمہ داریاں پوری کی ہیں، جبکہ امریکا کی جانب سے مفاہمتی یادداشت کی شق 9 کی خلاف ورزی کی جا رہی ہے۔

انہوں نے بتایا کہ معاہدے کی شق 9 کے مطابق امریکا خطے میں مزید فوجی دستے تعینات نہیں کرے گا، لیکن امریکی اقدامات اس شق اور طے شدہ وعدوں کے برعکس ہیں۔

ایرانی وزیر خارجہ نے زور دیا کہ کسی بھی معاہدے پر عملدرآمد یکطرفہ نہیں ہو سکتا، بلکہ دونوں فریقوں کو مساوی طور پر اپنی ذمہ داریاں نبھانا ہوں گی۔ انہوں نے کہا کہ آئندہ پیشرفت اسی صورت ممکن ہے جب امریکا بھی معاہدے کی مکمل پاسداری کرے۔

دریں اثنا، عباس عراقچی آج عمان کا دورہ کریں گے جہاں وہ خطے کی تازہ سکیورٹی صورتحال، بالخصوص آبنائے ہرمز میں پیدا ہونے والی کشیدگی پر اعلیٰ سطح کے مذاکرات کریں گے۔

ایرانی سرکاری خبر رساں ادارے ارنا کے مطابق عمانی حکام کے ساتھ ملاقاتوں میں علاقائی سلامتی، بحری گزرگاہوں کی صورتحال اور آبنائے ہرمز میں حالیہ پیش رفت پر تفصیلی مشاورت کی جائے گی۔

آبنائے ہرمز عالمی تجارت اور تیل کی ترسیل کے لیے دنیا کی اہم ترین سمندری گزرگاہوں میں شمار ہوتی ہے، اسی وجہ سے وہاں کی صورتحال پر عالمی برادری گہری نظر رکھے ہوئے ہے۔

تجزیہ کاروں کے مطابق ایران اور عمان کے درمیان ہونے والی یہ ملاقات خطے میں بڑھتی ہوئی کشیدگی، بحری سلامتی اور ممکنہ سفارتی پیش رفت کے حوالے سے خاص اہمیت رکھتی ہے۔