ابھیشیک شرما کی افغان بولرز کے خلاف دھواں دار بیٹنگ، 30 گیندوں پر سنچری

نئی دہلی: بھارت کے بائیں ہاتھ کے اوپنر ابھیشیک شرما نے ٹی ٹوئنٹی انٹرنیشنل کرکٹ میں بھارت کی جانب سے تیز ترین سنچری اسکور کرکے نئی تاریخ رقم کردی۔

ارون جیٹلی اسٹیڈیم میں افغانستان کے خلاف تیسرے ٹی ٹوئنٹی میچ میں بیٹنگ کی دعوت ملنے کے بعد ابھیشیک شرما نے بھارتی اننگز کا آغاز کیا اور صرف 30 گیندوں پر سنچری مکمل کرلی۔

ابھیشیک شرما نے 34 گیندوں پر 108 رنز کی دھواں دار اننگز کھیلی، جس میں 11 چھکے اور 9 چوکے شامل تھے۔

30 گیندوں پر سنچری کے ساتھ ابھیشیک شرما نے کسی فل ممبر ملک کے کھلاڑی کی جانب سے ٹی ٹوئنٹی انٹرنیشنل میں تیز ترین سنچری کا ریکارڈ اپنے نام کرلیا۔ اس سے قبل یہ ریکارڈ زمبابوے کے سکندر رضا اور نیوزی لینڈ کے فن ایلن کے پاس تھا، جنہوں نے 33، 33 گیندوں پر سنچریاں اسکور کی تھیں۔

تاہم ٹی ٹوئنٹی انٹرنیشنل میں مجموعی طور پر تیز ترین سنچری کا ریکارڈ اب بھی ایسٹونیا کے ساحل چوہان کے پاس ہے، جنہوں نے 2024 میں قبرص کے خلاف صرف 27 گیندوں پر سنچری مکمل کی تھی۔

ترکیہ کے محمد فہد نے 2025 میں بلغاریہ کے خلاف 29 گیندوں پر سنچری اسکور کرکے اس فہرست میں دوسری تیز ترین سنچری کا اعزاز حاصل کیا تھا۔