افغان سرحد پر انٹیلی جنس بیسڈ آپریشنز، 29 دہشت گرد ہلاک، متعدد ٹھکانے تباہ: آئی ایس پی آر

پاک فوج کے شعبہ تعلقاتِ عامہ (آئی ایس پی آر) نے کہا ہے کہ آپریشن "غضب للحق" کے تحت افغان سرحد سے ملحقہ علاقوں میں کامیاب انٹیلی جنس بیسڈ کارروائیوں کے دوران مجموعی طور پر 29 دہشت گرد ہلاک کر دیے گئے، جبکہ متعدد دہشت گرد زخمی ہوئے اور ان کے ٹھکانے بھی تباہ کر دیے گئے۔

آئی ایس پی آر کے جاری کردہ بیان کے مطابق ضلع باجوڑ میں خفیہ اطلاعات کی بنیاد پر کیے گئے ایک آپریشن میں 4 دہشت گرد مارے گئے۔ ہلاک ہونے والوں میں ہائی ویلیو کمانڈر خان فروش عرف زبل بھی شامل ہے، جبکہ دیگر تین دہشت گردوں کو بھارتی حمایت یافتہ تنظیم جماعت الاحرار سے وابستہ قرار دیا گیا ہے۔

بیان میں کہا گیا ہے کہ جماعت الاحرار اور فتنہ الخوارج سے وابستہ دہشت گردوں کے خلاف سرحد پار پکتیا، پکتیکا اور کنڑ کے علاقوں میں بھی کامیاب کارروائیاں کی گئیں، جن کے دوران دہشت گردوں کے تین مراکز تباہ کیے گئے اور 25 دہشت گرد ہلاک جبکہ متعدد زخمی ہوئے۔

آئی ایس پی آر کے مطابق کارروائیوں میں دہشت گردوں کے زیر استعمال اسلحہ، گولہ بارود اور دیگر جنگی سامان کے ذخائر بھی تباہ کر دیے گئے۔

ترجمان پاک فوج نے کہا کہ خیبرپختونخوا، بلوچستان اور کراچی میں ہونے والے دہشت گرد حملوں کا بھرپور جواب دیا جا رہا ہے، جبکہ سکیورٹی فورسز ملک سے دہشت گردی کے مکمل خاتمے کے لیے پُرعزم ہیں۔