اوٹاوا میں پاکستانی خطاطی کے فن پاروں کی نمائش جاری

اوٹاوا: کینیڈا کے دارالحکومت اوٹاوا میں پاکستانی ہائی کمیشن کے زیرِ اہتمام معروف پاکستانی خطاط فنکارہ عائشہ کمال کے فن پاروں کی تین روزہ نمائش جاری ہے، جس میں پاکستانی خطاطی کے روایتی فن اور جدید تخلیقی انداز کو خوبصورتی سے یکجا کیا گیا ہے۔

نمائش کا افتتاح یومِ اقبال 2026 کے موقع پر کینیڈا میں پاکستان کے ہائی کمشنر محمد سلیم نے کیا۔ اس سلسلے میں تقریب گلوبل سینٹر فار پلورلزم میں منعقد ہوئی، جس میں کینیڈین ارکانِ پارلیمنٹ، سفارت کاروں، فنونِ لطیفہ سے وابستہ شخصیات اور پاکستانی کمیونٹی کے نمائندوں نے شرکت کی۔

نمائش میں عائشہ کمال کے تخلیق کردہ فن پاروں کے ذریعے پاکستانی خطاطی کی خوبصورتی، ثقافتی گہرائی اور فنکارانہ جدت کو اجاگر کیا گیا۔

شرکا نے فن پاروں میں روایتی خطاطی اور جدید فن کے امتزاج کو سراہتے ہوئے پاکستانی فن و ثقافت میں گہری دلچسپی کا اظہار کیا۔

پاکستانی ہائی کمیشن کے زیرِ اہتمام اس نمائش کا مقصد پاکستان کے ثقافتی ورثے، اسلامی فنون اور خطاطی کی قدیم روایت کو کینیڈین معاشرے سے متعارف کرانا اور دونوں ممالک کے درمیان ثقافتی روابط کو مزید فروغ دینا ہے۔

تین روزہ نمائش عوام کے لیے بھی کھلی ہے، جہاں آرٹ سے دلچسپی رکھنے والے افراد پاکستانی خطاطی کے منفرد فن پاروں کا مشاہدہ کرسکتے ہیں۔