غزہ میں اسرائیلی حملہ، نصر اسپتال میں ڈاکٹر اور بچے سمیت 6 فلسطینی شہید

غزہ: جنوبی غزہ کے شہر خان یونس میں نصر اسپتال کے سرجری شعبے پر اسرائیلی فضائی حملے کے نتیجے میں ایک ڈاکٹر اور 13 سالہ بچے سمیت کم از کم 6 فلسطینی جاں بحق جبکہ 20 سے زائد زخمی ہوگئے۔

غزہ کی وزارتِ صحت اور سول ڈیفنس کے مطابق اسرائیلی حملہ جمعرات کی علی الصبح نصر اسپتال کے سرجری ڈیپارٹمنٹ پر کیا گیا، جس کے نتیجے میں اسپتال کی عمارت کے مختلف حصوں، آپریشن تھیٹرز اور طبی سہولیات کو شدید نقصان پہنچا۔

وزارتِ صحت نے جاں بحق ہونے والے ڈاکٹر کی شناخت ڈاکٹر رزق ابو شائرا کے نام سے کی ہے۔ حکام کے مطابق حملے کے بعد اسپتال میں زیرِ علاج متعدد مریضوں اور زخمیوں کو تباہ شدہ حصوں اور ملبے کے درمیان سے منتقل کرنا پڑا۔

دوسری جانب اسرائیلی فوج نے حملے کی تصدیق کرتے ہوئے دعویٰ کیا ہے کہ کارروائی کے دوران اسپتال کے احاطے میں موجود حماس کے ایک سینئر کمانڈر اور دیگر جنگجوؤں کو نشانہ بنایا گیا۔ اسرائیلی فوج کا الزام ہے کہ حماس اسپتال کو کمانڈ سینٹر کے طور پر استعمال کر رہی تھی، تاہم اس دعوے کے حق میں فوری طور پر کوئی شواہد پیش نہیں کیے گئے۔

نصر اسپتال غزہ کے ان چند طبی مراکز میں شامل ہے جو شدید تباہی کے باوجود اب بھی جزوی طور پر فعال ہیں۔ فلسطینی حکام کا کہنا ہے کہ مسلسل اسرائیلی حملوں کے باعث غزہ کا طبی نظام پہلے ہی تباہی کے دہانے پر پہنچ چکا ہے۔

فلسطینی حکام نے اسپتال پر حملے کی شدید مذمت کرتے ہوئے اسے طبی مراکز اور طبی عملے کے تحفظ سے متعلق بین الاقوامی قوانین کی خلاف ورزی قرار دیا ہے۔ اسرائیل کا مؤقف ہے کہ طبی تنصیبات کو عسکری مقاصد کے لیے استعمال کیے جانے کی صورت میں ان کی قانونی حیثیت متاثر ہوسکتی ہے۔