راولپنڈی ٹیسٹ کا تیسرا روز ختم، سری لنکا کے 404 رنز، پاکستان کی برتری ختم کرنے کے لیے مزید 30 رنز درکار

ویب ڈیسک: پاکستان اور سری لنکا کے درمیان راولپنڈی میں جاری پہلے ٹیسٹ میچ کے تیسرے روز کا کھیل کم روشنی کے باعث جلد ختم کردیا گیا۔ کھیل کے اختتام پر سری لنکا نے اپنی پہلی اننگز میں 4 وکٹوں کے نقصان پر 404 رنز بنا لیے ہیں۔

سری لنکا کی جانب سے دھننجایا ڈی سلوا 167 رنز جبکہ کوشل مینڈس 117 رنز بنا کر کریز پر موجود ہیں۔ دونوں بلے بازوں کے درمیان اہم شراکت نے سری لنکن ٹیم کو مضبوط پوزیشن میں پہنچا دیا ہے۔

اس سے قبل کامیندو مینڈس نے 58 جبکہ لاہیرو اڈارا نے 42 رنز کی اننگز کھیلی۔

سری لنکا کو پاکستان کی پہلی اننگز کی برتری ختم کرنے کے لیے مزید 30 رنز درکار ہیں۔ پاکستان کی جانب سے ڈیبیو کرنے والے ثاقب خان اور محمد عباس نے اب تک دو، دو کھلاڑیوں کو آؤٹ کیا ہے۔

واضح رہے کہ ٹیسٹ میچ کے دوسرے روز پاکستان نے اپنی پہلی اننگز 9 وکٹوں کے نقصان پر 434 رنز بنا کر ڈکلیئر کردی تھی۔

پاکستان کی جانب سے سعود شکیل 93 رنز کے ساتھ نمایاں رہے، جبکہ ڈیبیو کرنے والے عرفات منہاس نے 52 اور طیب عارف نے 57 رنز بنائے۔ محمد طحہٰ نے 51 اور بابر اعظم نے 50 رنز کی اننگز کھیلی۔

سری لنکا کے خلاف پہلے ٹیسٹ میچ میں پاکستان نے چار کھلاڑیوں کو ٹیسٹ ڈیبیو کا موقع دیا، جن میں طیب عارف، محمد طحہٰ، عرفات منہاس اور ثاقب خان شامل ہیں۔