ترکیہ میں عالمی ماحولیاتی کانفرنس کوپ 31 کے سربراہی اجلاس کا آغاز، عالمی رہنما شریک

ویب ڈیسک: ترکیہ کے شہر انطالیہ میں اقوام متحدہ کی عالمی ماحولیاتی کانفرنس کوپ 31 کے سربراہی اجلاس کا آغاز ہوگیا، جس میں پاکستان سمیت مختلف ممالک کے سربراہان اور عالمی رہنما شریک ہیں۔

ترکیہ کی میزبانی میں ہونے والے اس اجلاس میں قطر کے امیر شیخ تمیم بن حمد آل ثانی، ایران کے صدر مسعود پزشکیان، وزیراعظم پاکستان شہباز شریف، بنگلادیش کے وزیراعظم طارق رحمان اور یورپی کمیشن کی صدر ارسلا وان ڈیر لیین سمیت متعدد عالمی رہنما شرکت کر رہے ہیں۔

کانفرنس کا بنیادی مقصد عالمی درجہ حرارت میں اضافے کو ڈیڑھ ڈگری سینٹی گریڈ تک محدود رکھنے کے لیے مؤثر اور عملی اقدامات کو تیز کرنا ہے۔ اس سلسلے میں گرین ہاؤس گیسوں کے اخراج میں کمی، ماحول دوست پالیسیوں اور قابلِ تجدید توانائی کے استعمال کو فروغ دینے پر توجہ دی جائے گی۔

اجلاس کے دوران ترقی پذیر ممالک کو درپیش ماحولیاتی چیلنجز بھی زیر بحث آئیں گے۔ خصوصاً موسمیاتی تبدیلیوں کے اثرات سے نمٹنے کے لیے مالی معاونت، سیلاب اور خشک سالی سے تحفظ اور ماحولیاتی نقصانات کے ازالے کے لیے فنڈز کی فراہمی پر مذاکرات کیے جائیں گے۔

کانفرنس میں اس بات پر بھی غور کیا جائے گا کہ موسمیاتی تبدیلیوں سے سب سے زیادہ متاثر ہونے والے ممالک کو درکار مالی اور تکنیکی وسائل کیسے فراہم کیے جائیں تاکہ وہ قدرتی آفات کے نقصانات کم کرنے اور ماحولیاتی تحفظ کے لیے مؤثر اقدامات کرسکیں۔

کوپ 31 کا سربراہی اجلاس 20 نومبر تک جاری رہے گا، جس میں عالمی رہنما موسمیاتی تبدیلیوں سے نمٹنے کے لیے مشترکہ حکمت عملی اور مستقبل کے لائحہ عمل پر تبادلہ خیال کریں گے۔