پیٹرولیم مصنوعات کی قیمتوں کے روزانہ تعین کے لیے خصوصی کمیٹی قائم

(اسلام آباد) وفاقی حکومت نے پیٹرولیم مصنوعات کی قیمتوں کے روزانہ تعین کا نظام نافذ کرنے کے لیے خصوصی کمیٹی قائم کر دی ہے، جو نئے نظام کے عملی اور تکنیکی پہلوؤں پر سفارشات مرتب کرے گی۔

وفاقی وزیر پیٹرولیم علی پرویز ملک کی زیر صدارت انڈسٹری شراکت داروں کے مشاورتی اجلاس میں آئل اینڈ گیس ریگولیٹری اتھارٹی (اوگرا)، آئل کمپنیز ایڈوائزری کونسل (او سی اے سی)، آئل مارکیٹنگ کمپنیوں (او ایم سیز)، ریفائنریز اور دیگر متعلقہ اداروں کے نمائندوں نے شرکت کی۔

اجلاس سے خطاب کرتے ہوئے علی پرویز ملک نے کہا کہ نئے نظام کے تحت پیٹرولیم مصنوعات کی قیمتوں کا تعین ایک شفاف فارمولے کے مطابق کیا جائے گا، جس میں مارکیٹ کی حقیقی صورتحال کو مدنظر رکھا جائے گا۔

انہوں نے کہا کہ حکومت ناجائز منافع خوری، استحصال اور غیر معمولی مالی فوائد کی گنجائش کم کرنا چاہتی ہے، جبکہ اس اقدام کا مقصد عوام کو سیاسی مصلحتوں کی وجہ سے قیمتوں میں آنے والے غیر ضروری اتار چڑھاؤ سے محفوظ رکھنا بھی ہے۔

وزیر پیٹرولیم کے مطابق یہ اصلاحات حکومت کی مرحلہ وار ڈی ریگولیشن حکمت عملی کا اہم حصہ ہیں، جن کے ذریعے قیمتوں کے تعین میں حکومتی مداخلت بتدریج کم کی جائے گی۔

اجلاس کے دوران اوگرا، او سی اے سی، آئل مارکیٹنگ کمپنیوں، ریفائنریز اور دیگر اسٹیک ہولڈرز نے مجوزہ نظام پر اپنی تجاویز پیش کیں۔ علی پرویز ملک نے کہا کہ صنعت اور اوگرا سے مشاورت کے بعد روزانہ قیمتوں کے تعین کے نظام کے لیے معیاری طریقہ کار (ایس او پیز) تیار کیے جا رہے ہیں۔

انہوں نے مزید کہا کہ روزانہ قیمتوں کے نظام کے مؤثر نفاذ کے لیے خصوصی کمیٹی قائم کر دی گئی ہے، جو تمام عملی مسائل کو اتفاقِ رائے سے حل کرنے کے لیے سفارشات مرتب کرے گی۔