پاکستان کے لوگ انتہائی مہمان نواز ہیں، یہاں آکر خوشی ہوئی، برینڈن میک کولم

انگلینڈ کرکٹ ٹیم کے ہیڈ کوچ برینڈن میک کولم نے پاکستان کی مہمان نوازی، خوشگوار ماحول اور کرکٹ کنڈیشنز کو سراہتے ہوئے کہا ہے کہ پاکستان آکر انہیں ہمیشہ خوشی ہوئی ہے اور یہاں بہترین کرکٹ کھیلنے کا موقع ملا ہے۔

وائسزآف امریکاسے خصوصی گفتگو کرتے ہوئے برینڈن میک کولم کا کہنا تھا کہ وہ گزشتہ چند برسوں کے دوران متعدد بار پاکستان کا دورہ کر چکے ہیں۔ پاکستان کے لوگ انتہائی مہمان نواز ہیں اور یہاں کا ماحول بھی شاندار ہے۔

انگلینڈ کے ہیڈ کوچ نے کہا کہ پاکستان ایک مضبوط ٹیم ہے اور اس کی ہوم کنڈیشنز میں اسے شکست دینا آسان نہیں۔ پاکستان کو اپنے ہوم گراؤنڈ اور مقامی کنڈیشنز کا فائدہ حاصل ہے، اس لیے انگلینڈ کو اس کے خلاف جارحانہ حکمت عملی اپنانا ہوگی۔

برینڈن میک کولم کے مطابق پاکستان اور سری لنکا دونوں مضبوط ٹیمیں ہیں اور ان کے خلاف کھیلتے ہوئے حالات کے مطابق اپنی حکمت عملی تبدیل کرنا ضروری ہوتا ہے۔ پاکستان کے خلاف میچ میں بھی بدلتی ہوئی صورتحال کے مطابق خود کو ایڈجسٹ کرنا ہوگا۔

انگلینڈ کے ہیڈ کوچ کا کہنا تھا کہ سری لنکا کی کنڈیشنز میں بھی کھیلنا آسان نہیں ہوتا۔ اوے سیریز جیتنا ہمیشہ مشکل ہوتا ہے، تاہم پروفیشنل کرکٹرز کی ذمہ داری ہے کہ وہ ہر قسم کے حالات میں کامیابی حاصل کرنے کی کوشش کریں۔