امریکی راک بینڈ کا دورہ پاکستان مکمل، موسیقی کے ذریعے عوامی سفارتکاری کو فروغ
زاہد فاروق ملک16 نومبر، 2026
امریکی راک بینڈ برن دی بال روم نے اسلام آباد، لاہور اور کراچی کا دو ہفتوں پر مشتمل دورہ مکمل کرلیا۔ امریکی فنکاروں نے موسیقی پرفارمنس، ورکشاپس اور ثقافتی سرگرمیوں کے ذریعے ہزاروں پاکستانی نوجوانوں سے رابطہ کیا اور پاک امریکا عوامی سفارتکاری کو فروغ دیا
اسلام آباد: امریکی راک بینڈ ’’برن دی بال روم‘‘ نے پاکستان کا دو ہفتوں پر مشتمل دورہ مکمل کرلیا۔ 2 سے 15 نومبر تک جاری رہنے والے اس دورے کے دوران بینڈ نے اسلام آباد، کراچی اور لاہور میں موسیقی کے پروگراموں، تربیتی ورکشاپس اور تعلیمی سرگرمیوں میں شرکت کی۔

یو ایس آرٹس اینڈ اینوائے پروگرام کے تحت امریکی موسیقاروں نے ہزاروں پاکستانی نوجوانوں سے رابطہ کیا اور موسیقی کے ذریعے پاک امریکہ ثقافتی تعلقات کو فروغ دیا۔ بینڈ نے مختلف تعلیمی اداروں میں پرفارمنس کے علاوہ پاکستانی فنکاروں کے ساتھ مشترکہ موسیقی بھی پیش کی، جس میں ’’دل دل پاکستان‘‘ اور ’’امریکہ دی بیوٹی فل‘‘ کی دھنیں شامل تھیں۔

بینڈ کے ڈرمر جیک آئیونز نے پاکستانی مہمان نوازی کو اپنی زندگی کا منفرد تجربہ قرار دیتے ہوئے کہا کہ پاکستان میں ملنے والی محبت اور خلوص کو وہ ہمیشہ یاد رکھیں گے۔

دورے کے دوران امریکی فنکاروں نے نوجوانوں کو موسیقی کی عالمی صنعت میں کامیابی، تخلیقی کاروبار اور برانڈنگ کے حوالے سے عملی تربیت بھی فراہم کی۔ کراچی میں آرٹس کونسل آف پاکستان کے عالمی ثقافتی میلے میں شاندار پرفارمنس کے ساتھ دورے کا اختتام ہوا۔


زاہد فاروق ملک پاکستان کے ممتاز سینئر صحافی، کالم نگار اور میڈیا ایگزیکٹو ہیں۔ وہ پاکستان کے دارالحکومت اسلام آباد میں مقیم ہیں اور اس وقت وائسز آف امریکا کے بیورو چیف کے طور پر خدمات انجام دے رہے ہیں۔
شائع ہوا: 16 نومبر، 2026 کو 01:04 PM
آخری تدوین: 16 نومبر، 2026



