سسٹم تباہ نہیں ہوا اسے تباہ کرایا گیا، ہمیں غیر سیاسی نہیں سیاسی ری سیٹ کی ضرورت ہے: بلاول بھٹو

بلاول بھٹو زرداری نے کراچی میں گفتگو کرتے ہوئے سیاسی نظام کو ری سیٹ کرنے، اپوزیشن کا اعتماد بحال کرنے، سیاسی قیدیوں کی رہائی اور انتقامی کارروائیاں بند کرنے کا مطالبہ کردیا۔ مولانا فضل الرحمان اور پی ٹی آئی سے مذاکرات، آزادی صحافت اور ملکی معاشی صورتحال پر بھی اہم بیان دے دیا
کراچی: چیئرمین پاکستان پیپلز پارٹی بلاول بھٹو زرداری نے ملک میں سیاسی نظام کو ری سیٹ کرنے کی ضرورت پر زور دیتے ہوئے کہا ہے کہ حکومت کو اپوزیشن کا اعتماد بحال کرنا ہوگا، سیاسی قیدیوں کو رہا اور انتقامی کارروائیوں کا سلسلہ بند کرنا پڑے گا۔
کراچی پریس کلب میں صحافیوں سے گفتگو کرتے ہوئے بلاول بھٹو زرداری نے کہا کہ میڈیا معاشرے میں چیک اینڈ بیلنس کا اہم ذریعہ ہے، صحافی ملک کی اصل طاقت ہیں اور ان کی آواز اور قلم میں حکومتیں بنانے اور گرانے کی صلاحیت موجود ہے۔
انہوں نے کہا کہ شاید پاکستان کی تاریخ میں صحافت آج جتنی کمزور کبھی نہیں رہی۔ میڈیا کو بھی ری سیٹ کرنے کی ضرورت ہے تاکہ صحافیوں کو ان کا آئینی اور قانونی حق واپس مل سکے۔ اگر صحافیوں کو سچ بولنے سے پہلے سوچنا پڑے تو میڈیا کا ادارہ مؤثر انداز میں کام نہیں کرسکتا۔
بلاول بھٹو کا کہنا تھا کہ تمام اداروں میں قانونی حیثیت اور اعتماد کی بحالی ضروری ہے، اس کا آغاز میڈیا سے ہونا چاہیے۔ کراچی پریس کلب سے اس جدوجہد کا آغاز کرتے ہوئے انہوں نے کہا کہ پیپلز پارٹی آزادی صحافت کے لیے نسل در نسل جدوجہد کرتی آئی ہے اور صحافیوں کی آواز بننے کے لیے تیار ہے۔
چیئرمین پیپلز پارٹی نے کہا کہ پارلیمنٹ میں بحث اور اختلاف رائے جمہوریت کا حسن ہے، سیاسی اختلافات کا جواب گولی، بندوق اور دھمکیوں سے نہیں دیا جانا چاہیے۔ اپوزیشن پر تنقید کی بنیاد پر اس کی حب الوطنی پر سوال اٹھانا پارلیمان اور ملک دونوں کے ساتھ ناانصافی ہے۔
انہوں نے کہا کہ موجودہ سیاسی نظام خودبخود تباہ نہیں ہوا بلکہ اسے تباہ کیا گیا ہے۔ نظام کی بہتری کے لیے جو علاج تجویز کیا جا رہا ہے وہ درست نہیں۔ سیاسی نظام کو ری سیٹ کرنے کے لیے غیر سیاسی نہیں بلکہ سیاسی راستہ اختیار کرنا ہوگا اور یہ کام پارلیمان کے ذریعے ہی ممکن ہے۔
بلاول بھٹو زرداری نے حکومت پر زور دیا کہ مولانا فضل الرحمان کے تحفظات اور بیانات کا جواب دیا جائے۔ انہوں نے کہا کہ مولانا فضل الرحمان کے بغیر آج حکومت اقتدار میں نہ ہوتی، اس لیے مولانا فضل الرحمان اور پاکستان تحریک انصاف دونوں کا اعتماد بحال کرنا ضروری ہے۔
ان کا کہنا تھا کہ اگر حکومت چاہتی ہے کہ پارلیمان مؤثر انداز میں کام کرے تو اسے انتقامی کارروائیاں بند کرنا ہوں گی۔ آخر اپوزیشن سے مزید کتنا انتقام لیا جائے گا؟ سیاسی قیدیوں کی رہائی اور سیاسی ماحول میں بہتری کے بغیر جمہوری نظام آگے نہیں بڑھ سکتا۔
ملک کی معاشی صورتحال پر تشویش کا اظہار کرتے ہوئے بلاول بھٹو نے کہا کہ اپنی زندگی میں انہوں نے اتنے خراب معاشی حالات نہیں دیکھے۔ انہیں فکر ہے کہ ان حالات میں عام پاکستانی عوام کس طرح زندگی گزار رہے ہوں گے۔
انہوں نے کہا کہ سیاستدان عوام کے بنیادی مسائل کو بھول چکے ہیں اور سیاسی موضوعات پر تو بات ہوتی ہے لیکن عوامی مشکلات کے حل پر توجہ نہیں دی جا رہی۔ ملک کو سیاسی استحکام، جمہوری مکالمے اور عوامی مسائل کے حل کی ضرورت ہے۔
شائع ہوا: 17 نومبر، 2026 کو 12:27 PM
آخری تدوین: 17 نومبر، 2026



