اقوام متحدہ کے سیکریٹری جنرل انتونیو گوتریس اسلام آباد پہنچ گئے

اقوام متحدہ کے سیکریٹری جنرل انتونیو گوتریس نائب وزیراعظم اسحاق ڈار کی دعوت پر اسلام آباد پہنچ گئے، جہاں وہ اعلیٰ قیادت سے ملاقاتوں کے علاوہ یو این فوجی مبصر گروپ اور این ڈی ایم اے کا دورہ کریں گے
اسلام آباد: اقوام متحدہ کے سیکریٹری جنرل انتونیو گوتریس پاکستان پہنچ گئے ہیں، جہاں وہ اعلیٰ سیاسی و عسکری قیادت سے ملاقاتوں کے علاوہ پاک بھارت جنگ بندی کی نگرانی کرنے والے اقوام متحدہ کے فوجی مبصر گروپ کے ہیڈکوارٹرز اور نیشنل ڈیزاسٹر مینجمنٹ اتھارٹی (این ڈی ایم اے) کا دورہ کریں گے۔
انتونیو گوتریس نائب وزیراعظم اور وزیر خارجہ اسحاق ڈار کی دعوت پر اسلام آباد پہنچے۔ اسلام آباد پہنچنے پر قائم مقام سیکریٹری خارجہ نبیل منیر نے معزز مہمان کا استقبال کیا۔
اہم سیاسی و سفارتی ملاقاتیںدفتر خارجہ کے مطابق اقوام متحدہ کے سیکریٹری جنرل اپنے دورے کے دوران صدر مملکت، وزیراعظم، نائب وزیراعظم و وزیر خارجہ اسحاق ڈار اور فیلڈ مارشل سے ملاقاتیں کریں گے۔
انتونیو گوتریس کے دورے کے شیڈول میں پاک بھارت اقوام متحدہ کے فوجی مبصر گروپ کے ہیڈکوارٹرز کا دورہ بھی شامل ہے، جہاں انہیں خطے کی صورتحال اور جنگ بندی کی نگرانی سے متعلق امور پر بریفنگ دی جائے گی۔
این ڈی ایم اے میں بریفنگاقوام متحدہ کے سیکریٹری جنرل نیشنل ڈیزاسٹر مینجمنٹ اتھارٹی (این ڈی ایم اے) میں ایک خصوصی بریفنگ میں بھی شرکت کریں گے۔
بریفنگ کے دوران پاکستان کی عالمی امن و سلامتی، انسانی امداد اور قدرتی آفات سے نمٹنے کے لیے جاری کوششوں کو اجاگر کیا جائے گا۔
علاقائی اور عالمی صورتحال پر تبادلہ خیالترجمان دفتر خارجہ کے مطابق انتونیو گوتریس کا دورہ پاکستان علاقائی اور عالمی صورتحال پر تبادلہ خیال کا اہم موقع فراہم کرے گا۔ دورے کے دوران عالمی امن، کثیرالجہتی تعاون اور پائیدار ترقی کے لیے اقوام متحدہ کے سیکریٹری جنرل کی قیادت اور خدمات کا اعتراف بھی کیا جائے گا۔
دفتر خارجہ کا کہنا ہے کہ انتونیو گوتریس کا دورہ اقوام متحدہ کے کثیرالجہتی نظام کے لیے پاکستان کی مضبوط حمایت کا عکاس ہے۔
پاکستان نے ایک بار پھر اقوام متحدہ کے چارٹر کے مقاصد اور اصولوں سے اپنی وابستگی کا اعادہ کیا ہے اور عالمی امن، سلامتی اور بین الاقوامی تعاون کے فروغ کے لیے اقوام متحدہ کے کردار کی حمایت جاری رکھنے کے عزم کا اظہار کیا ہے۔
شائع ہوا: 6 اکتوبر، 2026 کو 03:40 AM
آخری تدوین: 6 اکتوبر، 2026



