ایپل کی مارکیٹ ویلیو کو بڑا دھچکا، دنیا کی سب سے قیمتی کمپنی کا اعزاز خطرے میں

کیلیفورنیا: عالمی شہرت یافتہ ٹیکنالوجی کمپنی ایپل کو دنیا کی سب سے قیمتی کمپنی ہونے کا اعزاز برقرار رکھنے کے لیے بڑے چیلنج کا سامنا ہے، جبکہ کمپنی کی مارکیٹ ویلیو میں تقریباً 500 ارب ڈالر تک کمی کا خدشہ ظاہر کیا جا رہا ہے۔

میڈیا رپورٹس کے مطابق مصنوعی ذہانت (AI) سے متعلق چِپ بحران کے باعث ایپل کی سپلائی چین متاثر ہونے کا امکان ہے، جس سے کمپنی کی پیداواری صلاحیت اور مستقبل کی کاروباری کارکردگی پر منفی اثرات مرتب ہو سکتے ہیں۔

تجزیہ کاروں کا کہنا ہے کہ ایپل کے سروسز کاروبار کی توقع سے کم رفتار نمو اور سپلائی چین پر بڑھتے ہوئے دباؤ نے سرمایہ کاروں کی تشویش میں اضافہ کر دیا ہے، جس کے باعث کمپنی کے مستقبل سے متعلق خدشات بڑھ رہے ہیں۔

دوسری جانب کمپنی کی کمزور مالی پیش گوئی نے بھی سرمایہ کاروں کا اعتماد متاثر کیا ہے، جس کے نتیجے میں ایپل کے حصص میں نمایاں کمی دیکھنے میں آئی۔

برطانوی خبر رساں ادارے کے مطابق جمعہ کے روز ایپل کے شیئرز میں تقریباً 10 فیصد کمی ریکارڈ کی گئی، جس کے بعد کمپنی کی مجموعی مارکیٹ ویلیو میں تقریباً 500 ارب ڈالر تک کمی کا خدشہ پیدا ہو گیا ہے۔

ماہرین کے مطابق اگر کمپنی کو مصنوعی ذہانت، نئی مصنوعات کی فروخت اور سپلائی چین سے متعلق چیلنجز کا سامنا رہا تو دنیا کی سب سے قیمتی کمپنی کا اعزاز بھی خطرے میں پڑ سکتا ہے۔