ایپل مصنوعات کی قیمتوں میں بڑا اضافہ، میک بک، آئی پیڈ اور دیگر ڈیوائسز مہنگی ہوگئیں

کیلیفورنیا: ٹیکنالوجی کمپنی ایپل نے جدید ہارڈویئر اجزاء کی عالمی سطح پر بڑھتی ہوئی قیمتوں کے باعث اپنی متعدد مصنوعات کی قیمتوں میں نمایاں اضافہ کر دیا ہے، جس کے بعد میک بک، آئی پیڈ اور دیگر ایپل ڈیوائسز پہلے کے مقابلے میں زیادہ مہنگی ہو گئی ہیں۔

عالمی میڈیا رپورٹس کے مطابق قیمتوں میں اضافے کا اطلاق میک بک، آئی پیڈ، میک اسٹوڈیو، میک منی، ہوم پوڈ اور ایپل ٹی وی سمیت کئی مصنوعات پر کیا گیا ہے۔

رپورٹس میں بتایا گیا ہے کہ مصنوعی ذہانت (AI) پر مبنی نئی ٹیکنالوجیز کے تیزی سے فروغ نے زیادہ طاقتور پروسیسرز، زیادہ ریم (میموری) اور تیز رفتار اسٹوریج کی طلب میں نمایاں اضافہ کر دیا ہے، جس کے نتیجے میں ان ہارڈویئر اجزاء کی قیمتیں بھی بڑھ گئی ہیں۔

ماہرین کے مطابق صرف صارفین ہی نہیں بلکہ دنیا بھر کی بڑی ٹیکنالوجی کمپنیاں اور ڈیٹا سینٹرز بھی انہی جدید چِپس اور میموری ماڈیولز کی بڑی مقدار میں خریداری کر رہے ہیں، جس سے سپلائی چین پر دباؤ بڑھ گیا ہے اور الیکٹرانک مصنوعات کی تیاری کی لاگت میں اضافہ ہوا ہے۔

صنعتی تجزیہ کاروں کا کہنا ہے کہ مصنوعی ذہانت سے لیس ڈیوائسز کی بڑھتی مقبولیت کے باعث یہ رجحان وقتی نہیں بلکہ مستقبل میں بھی جاری رہنے کا امکان ہے۔ ان کے مطابق آنے والے برسوں میں AI فیچرز اسمارٹ فونز، لیپ ٹاپس اور دیگر الیکٹرانک مصنوعات کی قیمتوں کا اہم حصہ بن سکتے ہیں۔

ماہرین کا مزید کہنا ہے کہ اگر عالمی سطح پر جدید چپس، میموری اور اسٹوریج کی طلب اسی رفتار سے بڑھتی رہی تو نہ صرف ایپل بلکہ دیگر ٹیکنالوجی کمپنیوں کی مصنوعات کی قیمتوں میں بھی مزید اضافہ دیکھنے کو مل سکتا ہے۔